Ysige koue het groot dele van Europa in sy greep
2012-02-02 22:33
- Artikelopsies
- Deel
- Kry Volksblad op
INNSBRUCK. – Minstens 120 mense is teen gistermiddag dood weens die ysige koue wat groot dele van Europa in sy greep het.
In die Oekraïne het temperature van so laag as -30°Celsius die lewe van 63 mense geëis, terwyl die Poolse owerhede bekend gemaak het minstens 29 mense het in dié land van die koue omgekom. Die meeste slagoffers was dakloos.
Ander lande met hoë sterftesyfers, sluit in Roemenië (22) en Bulgarye (10).
Laasgenoemde se hoofstad, Sofia, het Dinsdag die laagste temperatuur die afgelope honderd jaar gemeet. Selfs die kitsbanke het luidens mediaberigte gevries.
Die koue front, wat sy oorsprong in Siberië het, het Oos-Europa die swaarste getref. Wes-Europa loop egter ook kwaai deur.
Swaar sneeu het land- en lugverkeer in onder meer Switserland, Oostenryk en Italië ontwrig.
Sowat 180 vlugte van Istanboel in Turkye is gisteroggend gekanselleer, terwyl honderde paaie in die ooste van dié land weens dik sneeu ontoeganklik is.
- Volksblad