Vatikaan glo katnes van korrupsie
2012-01-30 21:45
- Artikelopsies
- Deel
- Kry Volksblad op
Briewe aan pous lek uit
DEN HAAG. – Die Vatikaan is ’n katnes van korrupsie en magsmisbruik. Dít blyk uit ’n reeks briewe wat aartsbiskop Carlo Maria Vigano, sekretaris-generaal van die Vatikaanse regering, aan die pous geskryf en wat uitgelek het.
Die Europese media het die laaste dae groot aandag hieraan gegee, veral omdat Vigano ná sy briewe aan pous Benedictus XVI uit sy pos verwyder en as Vatikaanse ambassadeur na Washington gepos is.
Dié onthulling is gedoen in ’n Italiaanse televisieprogram. Die Vatikaan se reaksie was om die makers van die program se joernalistieke etiek te betreur, maar die bestaan van die briewe self is, opvallend genoeg, nie ontken nie.
In die briewe lig Vigano Benedictus in oor die toestand wat hy in die regering van die Vatikaan aangetref het toe hy in 2009 as hoof van dié onafhanklike ministaatjie se regering aangestel is. Hy sê hy het afgekom op ’n web van korrupsie en nepotisme in die toekenning van kontrakte.
In een van die briewe skryf hy kontrakte is dikwels aan dieselfde ondernemings toegeken teen pryse wat dubbel so hoog as dié van mededingers was.
Hy het byvoorbeeld agtergekom dat die Kersfeesstal wat op die plein voor die St. Petruskatedraal opgerig is, 550000euro (byna R5,6miljoen) kos, wat hopeloos te veel is.
Die finansies van die Vatikaan is deur ’n komitee van bankiers onder die voorsitterskap van mnr. Ettore Gotti Tedeschi hanteer, wat glo eerder na hul eie belange as na dié van die Vatikaan omgesien het.
Ander kardinale in die Vatikaan was volgens Vigano goed op die hoogte van sake.
Blykbaar het Vigano se briewe (en die besnoeiings wat hy afgedwing het) groot onmin by sy kollegas in die Vatikaan veroorsaak. Op 22 Maart verlede jaar het die Vatikaan Vigano in kennis gestel dat hy na Washington gepos is, hoewel sy aanstelling tot 2014 sou gegeld het.
- Volksblad