Romney gewildste onder Republikeine
2012-02-01 23:00
PRETORIA. – Meer as 76% van Republikeine in die Amerikaanse deelstaat Florida meen mnr. Mitt Romney staan die beste kans om pres. Barack Obama in November uit die kussings te lig.
Romney het pas die Republikeinse voorverkiesing in dié kosmopolitiese suidelike staat gewen.
Hy het sy naaste teenstander, mnr. Newt Gingrich, met 46% van die stem teenoor 32% geklop en daarmee die duidelike voortou geneem in ’n stryd wat toenemend om die “verkiesbaarheid” van Obama se Republikeinse teenstander gaan.
Nadat Gingrich, in Amerika bekend as ’n “politieke straatvegter”, twee weke gelede die stryd in die uiters konserwatiewe Suid-Carolina gewen het, is verwag dat hy dié momentum teen Romney, ’n skatryk sakeman, in Florida sou behou.
Dit was egter konserwatiewe Republikeine wat Gingrich in Florida, Amerika se negende grootste staat, die rug gekeer het.
Volgens gegewens wat gister deur die Republikeinse Party in Florida bekend gemaak is, het 41% van “uiters konserwatiewe” kiesers vir Romney gestem en 52% van die “matig” konserwatiewes. Boonop het 59% van “matig liberale” kiesers ook vir hom gestem.
Romney, wat ’n baie sterk teen-immigrasie-beleid voorstaan, het ook bo verwagting goed gevaar onder die Spaanssprekende kiesers deur 54% van hul stem te trek. Dit sluit in 57% van die stem van die groot gemeenskap Kubaanse immigrante in dié staat.
Kenners het in die vernaamste Amerikaanse koerante en op TV-netwerke gesê sy goeie vertoning in Florida, wat as een van die belangrike “swaaistate” in Amerikaanse verkiesings bekend is, is ’n belangrike aanduiding van sy “verkiesbaarheid” in die ander groot deelstate soos Texas, Georgia, Kalifornië, Colorado, Minnesota, Ohio, Pennsilvanië en Illinois.
Dis state waar die politieke demografie soortgelyk is aan dié van Florida en strek dus tot Romney se voordeel.
Die volgende Republikeinse voorverkiesing is Saterdag in Nevada.
Daarna volg die deurslaggewende stemmings in Colorado en Minnesota.
As Gingrich nie in albei die state daarin slaag om Romney oortuigend te klop nie, meen waarnemers, is die veldtog waarskynlik verby vir die strydlustige voormalige speaker van die Amerikaanse senaat.
Vir die ander twee oorblywende Republikeinse kandidate, mnre. Ron Paul en Rick Santorum – met onderskeidelik 11% en 15% van die stem in Florida – is die wedloop waarskynlik reeds verby.