‘Eers Madonna, dán oorlog’
2012-02-10 22:03
- Artikelopsies
- Deel
- Kry Volksblad op
JERUSALEM. – “Moenie die musiek stop nie, asseblief!”
Dit is die pleidooi van ’n Israelse aanhanger van die sanger Madonna wat ’n spesiale Facebook-groep gestig het om die regering te versoek om Iran nie binne te val tot ná Madonna se beplande konsert in Mei nie.
“Bibi! Geen oorlog met Iran nie tot ná Madonna se konsert op 29 Mei!” pleit die anonieme bewonderaar in Hebreeus op die pas gestigte groep se blad op Facebook.
“Bibi” is ’n gewilde bynaam vir die premier van Israel, mnr. Benjamin Netanyahu.
Madonna beplan om haar langverwagte 2012-wêreldtoer in Mei in Israel te begin. Die Israelse media berig dat sy ’n paar weke voor die openingsaand in Israel sal aankom sodat sy aan die finale repetisies vir die konsert kan deelneem.
Terwyl Madonna-aanhangers hulle gereedmaak om kaartjies vir die vertoning aan te skaf, word daar al hoe meer bespiegel oor ’n moontlike Israelse aanval op Iran oor sy kernprogram, wat die Joodse staat as ’n verdoeseling van kernwapenontwikkeling beskou.
Iran ontken die aantygings, maar volgens berigte glo Israel Iran kan teen die einde van die Noordelike Halfrond se winter reeds kernwapens gereed hê, en oorweeg daarom ’n militêre aanval in die lente of somer om dié Iranse vermoë uit te wis. – Sapa-AFP
- Volksblad