Diamante van R19 m. uit kluis weg
2010-09-09 00:21
- Artikelopsies
- Deel
- Kry Volksblad op
Okahandja - Diamante van $2,6 miljoen (R18,8 miljoen) is gesteel uit die kluis van ’n Namibiese poleermaatskappy wat gedeeltelik aan die diamantreus De Beers behoort.
Gepoleerde en ongepoleerde diamante is uit die kluis by NamGem, ’n filiaal van die Namdeb-diamantmaatskappy, ’n gesamentlike onderneming van die Namibiese regering en De Beers, gesteel, het mnr. Kennedy Hamutenya, voorsitter van NamGem, gesê.
Hamutenya, wat ook Namibië se diamantkommissaris is, het gesê mense binne die maatskappy was waarskynlik daarvoor verantwoordelik.
“Niemand het by die kluis ingebreek waar die diamante gebêre is nie.”
Die diefstal het by NamGem se kantore op Okahandja, sowat 70 km noord van Windhoek, gebeur.
Diamant-uitvoer is steeds besig om van die wêreldwye ekonomiese krisis verlede jaar te herstel, wat Namdeb se inkomste met 40% verlaag het.
Volgens Namdeb was diamantproduksie in die eerste ses maande van vanjaar meer as dubbeld wat dit in dieselfde tydperk verlede jaar was.
- Sapa - AFP