Danseres bieg oor verhouding
2012-02-02 22:31
ROME. – Die blonde Moldowiese danseres wat saam met die kaptein op die Costa Concordia gekuier het, het aan aanklaers gesê sy was “verlief” en “’n gas” van die kaptein.
“Ja, dit is waar. Ek is verlief op kapt. (Francesco) Schettino,” het me. Domnica Cemortan (25) erken, het die Italiaanse dagblad La Stampa berig.
Tot dusver het sy gerugte oor die twee se verhouding ontken en gesê Schettino is getrou aan sy vrou.
Schettino (52) is getroud en het ’n dogter.
Sy het glo ook erken sy was saam met die kaptein op die brug van waar hy bevele gee toe die luukse passasierskip op 13 Januarie op die rotse geloop en omgekantel het.
Altesaam 32 van die 4229 passasiers en bemanningslede is dood.
Cemortan het vroeër gesê sy het ten tyde van die voorval saam met vriende geëet. Schettino het ook aan ondersoekbeamptes gesê daar was niemand behalwe gemagtigde personeel op die brug nie.
Die Italiaanse media meen Cemortan is ’n sleutelgetuie in die raaisel oor waarom die skip op die rotse geloop het.
Schettino is steeds in huisarres. –Sapa-AFP
- Volksblad