Bewyse van oseaan op Mars gekry
2012-02-09 22:27
KAAPSTAD. – Die Mars Express-ruimtetuig het sterk bewyse gevind dat ’n oeroue oseaan vroeër ’n groot deel van dié planeet beslaan het. Die MARSIS-radar, wat aan die Europese Ruimte-agentskap (Esa) behoort, versamel reeds sedert 2005 data oor die planeet. Die radar dring tot diep onder die oppervlak in en onthul die eerste 60 tot 80m onder die oppervlak.
Verskeie ander ruimtetuie het al foto’s geneem van areas wat soos kuslyne lyk. Dit is selfs moontlik dat daar twee oseane kon gewees het, het dr. Jérémie Mouginot, wat die ondersoek lei, in ’n verklaring gesê.
Die eerste oseaan dateer van vier miljard jaar gelede, toe daar warmer weer was, en die tweede van drie miljard jaar gelede, toe ys onder die oppervlak gesmelt en die water na laer areas geloop het.
“Ons sien bewyse van sedimentêre neerslae en ys. Dit is van ’n lae digtheid wat eie is aan materiaal wat erosie ondergaan het en weggevoer is na die eindbestemming,” het Mouginot gesê. Die latere oseaan sou net tydelik gewees het en net vir ’n miljoen jaar of minder bestaan het. Die water sou weer gevries en ondergronds bewaar gewees het, of verdamp het.
“Ek dink nie dit het lank genoeg bestaan vir lewe om daarin te vorm nie,” het Mouginot gesê.
- Volksblad