Dave het roeping gevind en dit gaan uitstekend
2011-12-15 22:14
- Artikelopsies
- Deel
- Kry Volksblad op
Met sy stywe denimbroek, blou langmouhemp en deurmekaar kuif het hy sy weergawe van City and Colour se Day Old Hate aangepak. ’n Bietjie minder as twee minute later is hy aangewys as Suid-Afrika se nuwe Idol.
“Ek wil mense leer om musiek te waardeer en ek wil my musiek met mense deel. Ek wil die wêreld verander – met musiek,” vertel die 21-jarige David van Vuuren enkele maande nadat hy met die Idols-titel bekroon is.
Dit gaan goed met hom. Sy debuutalbum, Free the Animals, is in November uitgereik en hy is verloof aan die vrou van sy drome.
’n Mens kan nie help om te dink sy siel is nie vir die 21ste eeu gemaak nie. Hy hoort saam met sy groot inspirasie, Jeff Buckley, op ’n verhoog – hoewel hy nie saam met Buckley sou wou optree nie.
“Ek sou op my rug op die verhoog gaan lê en net alles indrink, net luister na die beste musikant wat daar is.”
Hy het in die Idols-kompetisie die beoordelaars sowel as aanhangers met sy weergawes van ander kunstenaars se liedjies beïndruk. Die vertolking wat waarskynlik die meeste uitstaan, is Vincent van Don McLean, die liedjie wat oor Vincent van Gogh handel.
Dave se weergawe van Vincent is ook opgeneem op Free the Animals, wat uit twee CD’s bestaan. Die tweede CD bevat ses liedjies wat in die ateljee opgeneem is en sluit in Day Old Hate en The Blower’s Daughter van Damien Rice.
Die titel van die CD verwys na die negatiewe gedagtes wat die mens saam met hom dra. “Ons het elkeen diere, oftewel negatiwiteit, waarvan ons ontslae behoort te raak. Die mens is selfsugtig en miskien as ons meer omgegee het, sou baie meer diere nog soos vroeër jare vry kon rondloop.”
Hy het sy roeping gevind en is vasbeslote om sy boodskap oor te dra: “Ek wil mense leer om hul hart en siel te volg. As elkeen dit doen, sal die wêreld ’n baie beter plek wees. Dit is tyd dat ons van al die negatiwiteit ontslae raak. Geluk kom van binne ons.”
Wanneer hy oor Jess Nolan, sy verloofde en die liefde van sy lewe, gesels, kry jy hom nie gou weer stil nie. “Sy is my sielsgenoot. Ek wil en gáán die res van my lewe saam met haar deurbring. Wat tussen my en haar is, is pragtig.”
Die twee beplan om in Oktober 2012 hul liefde vir mekaar amptelik te maak. Hy het ’n indrukwekkende debuutalbum, ’n blink toekoms wat wag en sy verloofring is aan sy geliefde se vinger. Dit gaan goed met Dave van Vuuren.
- Dave wil in Februarie met ’n landwye toer begin. Besoek sy Facebook-blad by www.facebook.com/davidvanvuuren vir meer inligting.