Bacchus Nel en eerlike folk in Rosendal
2011-12-15 22:14
- Artikelopsies
- Deel
- Kry Volksblad op
Teatergangers in Rosendal kry Sondag met ’n perd, oftewel ’n klank, van ’n ander kleur te doen wanneer ’n rasegte folk-trio musiek maak soos dit aan die begin van die vorige eeu geklink het.
Maar daarvoor moet tot die tweede helfte gewag word, want voor pouse is Bacchus Nel eers aan die beurt.
Dié sanger-liedjieskrywer het vanjaar sy tweede album, Tussen junk & jewelry, uitgegee ses jaar nadat sy debuutalbum, In die arms van die nag, verskyn het .
Op die nuwe CD is daar liedjies soos Die dooie hoender wals, wat ’n mens aan Brel herinner, Bitterblou en So blou as wat kan kom met ’n orreltjie wat saamkreun. En daar is selfs ’n liedjie oor vuil skottelgoed en ’n asblik, wat in Nel se talentvolle hande tot poëtiese status verhef word.
Marissa West, wat op die CD ’n paar duette saam met Nel sing, sal nie Sondag saam met hom op die verhoog wees nie.
Maar Nel en sy kitaar sal daar wees, en sy musiek, wat soos klankskilderye voor jou sal afspeel.
Die folk-musikante in die konsert is Vana en sy Foot-Up-Folk Trio van Pretoria wat hul bluegrass, country en standaard-folkmusiek baie ernstig opneem.
Die afgelope vyf jaar het hy en die groepe Velvet and the Horse, Green Acre en The Oh So Serious Folk Collective dié musiek op feeste soos Splashy Fen, Durban Blues en Oppikoppi gemaak.
Vana is die sanger en kitaarspeler en Sondag is sy Foot-Up-Folk-vennote die trekklavierspeler Rian Britz en kontrabasspeler Rynier Prins.
’n Mens kan sommer van die instrument-kombinasie aflei dit gaan ’n onopgesmukte vertoning wees.
Vana skryf self van die liedjies en daarvoor put hy inspirasie uit die musiek van die vorige eeu kry.
Dit kan ook gehoor word op die albums Havana Pepper, Like Good Wine en Oh So Serious Folk Collective.
Bespreek vir die vertoning by 0 058 211 0902.