Skrywer sterf twee maande voor debuut
2012-02-01 23:00
- Artikelopsies
- Deel
- Kry Volksblad op
SKAARS twee maande voordat sy langverwagte literêre debuut in boekvorm sou verskyn, is ’n Johannesburgse skrywer die naweek onverwags aan ’n hartaanval dood.
Jacques Pretorius (38) se So lig soos klip oor ’n jong polisieman verskyn einde Maart. Tafelberg-uitgewers beskryf die werk as “uitdagend” en “uiters verontrustend”.
Pretorius, wat teologie en filosofie aan die destydse RAU (vandag die Universiteit van Johannesburg) gestudeer het, het sy eie maatskappy gehad en die afgelope jaar meestal tyd aan sy boek bestee.
Sy vrou, Christelle Snyman, met wie hy in Oktober getroud is, het gesê: “Die boek was so ’n groot verwesenliking van Jacques se droom en ek is so hartseer dat hy nie die volgende een sal klaarmaak nie. Ek sal alles in my vermoë doen om te help dat die boek ’n sukses is.”
Die verteller in So lig soos klip is ’n polisieman wat in die brandende townships van die 1980’s diens doen. Dit is ’n lewe op die randjie van die afgrond en daarom is sy eerste lewensbeginsel: Hou altyd die laaste patroon vir jouself.
Dit is met sy opleiding in sy bewussyn ingestamp – Reël Nommer Een.
Met die polisie as surrogaatpa is hy ook ideaal toegerus vir die jagtog van sy lewe – die soeke na die ideale vrou.
Hierdie private jagtog van hom is net so meedoënloos soos die polisielewe. Soos die openbare geweld in die townships eskaleer, groei in hom ’n intieme geweld, net so donker en net so vernietigend.
- Volksblad