'Phuza Thursday' afgestel ná Survivor-man se ongeluk
2010-03-10 13:22
- Artikelopsies
- Deel
- Kry Volksblad op
Dorette Marais
Kaapstad - Die platejoggie Gareth Cliff het op die sosiale netwerk Twitter gesê die radiostasie 5FM se weeklikse instelling 'Phuza Thursday', sal Donderdag afgestel word.
Dit kom nadat die musikant Molemo Maarohanye, beter bekend as Jub Jub, en Themba Tshabalala, ’n vriend, na bewering in twee Mini Coopers tussen ‘n klomp kinders ingeploeg het. Hulle was glo onder die invloed van alkohol toe die voorval plaasgevind het.
Volgens Cliff sal 'Phuza Thursday' nie more gevier word nie om ‘n punt te maak oor dié kinders se tragiese dood.
Phuza is ‘n Zulu-term vir drink en 'Phuza Thursday', word weekliks op ‘n Donderdag ‘gevier’. Dié konsep is glo deur Cliff self uitgedink nadat hy kommentaar gelewer het oor inwoners van Johannesburg wat hul naweek op ‘n Donderdag al begin vier deur dronk te raak.
Die radiostasie sê tog gereeld dat net omdat die woord Phuza drink beteken, dit nie noodwendig die inname van alkohol moet wees nie en dat hulle nie dronkbestuur ondersteun nie.
Prince Mahube (17), Phumelelo Masemelo (16), Mlugisi Cwayi (17) en Andile Mthombeni (19) is Maandag tydens dié voorval dood. Dié vier vriende is op die toneel dood, terwyl twee ander skoolkinders, Fumani Mushanana (17) en Frank Mlabo (18), ernstig beseer is en na die Chris Hani Baragwanath-hospitaal geneem is.
Maarohanye, wat ook ’n deelnemer aan Survivor SA: Santa Carolina was, en Tshabalala het glo resies gejaag toe die ongeluk gebeur het.
Die twee mans het Woensdagoggend kortliks in die beskuldigdebank van die Protea-landdroshof verskyn op vier aanklagte van moord, twee aanklagte van poging tot moord, ‘n klag van roekelose en nalatige bestuur en een van bestuur onder die invloed van alkohol.
- Nuus24