Naomi, nie Charlize, kry toe Diana-rol
2012-02-10 22:03
LOS ANGELES. – Die King Kong-ster Naomi Watts sal die rol van prinses Diana speel in wat na verwagting die eerste groot internasionale bio-fliek oor dié ikoon se lewe sal wees.
Daar is reeds geruime tyd gefluister dat Suid-Afrika se goue meisie Charlize Theron moontlik dié rol sou kry, berig eonline.com.
Hoewel Theron vir ’n Golden Globe benoem is vir haar nuwe fliek, Young Adult, is sy oor die hoof gesien met die Oscar-benoemings. Dié fliek verskyn in April op die plaaslike silwerdoek.
Ecosse Films, die Britse vervaardiger, het eergister egter aangekondig dat Watts as die Prinses van Harte te sien sal wees in Caught in Flight, berig Reuters.
Volgens die vervaardigers sal Caught in Flight op die laaste twee jaar van Diana se lewe fokus toe sy “ware persoonlike geluk” ervaar het voordat sy in 1997 in Parys verongeluk het.
“Prinses Diana was oor die wêreld heen gelief,” het Watts in ’n verklaring gesê.
“Ek sien uit na die uitdaging om die rol van die mense se prinses te vertolk.”
- Volksblad