Mandela se sjef stel kookboek bekend
2012-02-03 21:56
JOHANNESBURG. – Die “madam” wat oudpres. Nelson Mandela se persoonlike sjef leer kook het, was daar toe Xoliswa Ndoyiya haar kookboek bekend gestel het.
Ndoyiya se boek, Ukutya Kwasekhaya: Tastes from Nelson Mandela’s Kitchen, bevat die resepte van disse wat Ndoyiya die laaste 19 jaar vir die staatsman en sy gesin gekook het. Al was Mandela nie self by die bekendstelling nie, was sewe van sy familielede daar en sy kleinseun, mnr. Hlanganani (Luvuyo) Mandela, het vooraf vertel hoe “Mam’ Xoli” meer ’n familielid as net ’n kok in hul huis was toe hy grootgeword het.
Die ouditorium by die Nelson Mandela-stigting in Johannesburg was Donderdag stampvol. Van heel agter in die ouditorium het me. Paulette Rothstein geesdriftig vir haar voormalige werknemer gewaai toe dié vra of haar “madam” ook daar is.
“Ek is so trots op haar en opgewonde vir haar onthalwe dat ek gisteraand (Woensdagaand) amper glad nie geslaap het nie,” het Rothstein ná die verrigtinge gesê.
Sy het vertel Ndoyiya het as ’n jong meisie van die Oos-Kaap gekom en by hul huiswerker, me. Miriam Ngcayicibi, gebly terwyl sy werk gesoek het. Rothstein het besluit om haar ook aan te stel en haar te leer kos maak.
“Sy is ’n baie spesiale vrou en my kinders was mal oor haar.”
Op ’n dag in 1992 het Ndoyiya aangekondig al is sy baie gelukkig, het sy ’n ander werk gekry en sy moes die Rothsteins verlaat.
“Sy was baie geheimsinnig daaroor en ek het gehuil en letterlik aan haar rok getrek om te keer dat sy loop.”
Rothstein het vertel sy het The Star eendag oopgemaak en ’n artikel oor bekendes en hul sjefs gesien. Sy het die klein foto onder Mandela s’n dadelik herken en uitgeroep: “Haai, daar’s Xoli!”
Sy het nooit geweet haar voormalige huiswerker werk vir die president nie.
Ndoyiya was baie emosioneel toe sy in haar toespraak almal bedank het wat tot die boek bygedra het en het ’n traan weggepink toe sy ’n geraamde weergawe van haar boek met ’n nota van “Tata” self ontvang het. “Dankie dat jy ons al hierdie jare so goed gevoer het,” lui die handgeskrewe briefie van die 93-jarige staatsman.
- Volksblad