Jeugroman verander Pretoria in ’n fliekstel
2012-02-08 22:20
- Artikelopsies
- Deel
- Kry Volksblad op
Opwindende nuwelinge in die hoofrolle, veterane wat bystand verleen, Pretoria se Garsfontein en Menlopark as agtergrond en ‘n bekroonde jeugboek deur ‘n Blou Bul-ondersteuner is die bestanddele van ‘n splinternuwe fliek wat nou vir kykNET in Pretoria verfilm word.
Derick van der Walt het in 2008 die Goue Sanlam-prys vir jeuglektuur en die jaar daarna die M.E.R.-prys vir jeugboeke gewen vir Lien se lankstaanskoene, uitgegee deur Tafelberg. Die boek, wat landwyd vir IEB-skole voorgeskryf is, is die aangrypende verhaal van ‘n matriekmeisie wat te midde van ‘n gesinskrisis leer ‘n mens het meestal twee keuses onder sulke omstandighede: óf jy sink, óf jy swem.
Die draaiboek is behartig deur die bekende teaterregisseur en dramaturg Saartjie Botha.
Van der Walt het gister gesê hy was dié week op stel by die besige Hoërskool Garsfontein, maar was só besig om te lyk asof hy alles gewoond is dat hy skoon die naam van een van sy hoofkarakters, Lien se ma, Christien Jooste, vergeet het.
“Ek is baie bewus van die feit dat ‘n fliek en ‘n boek twee verskillende dinge is,”sê Derick, “en het daarom veranderings verwag.” Die aktrise wat Lien speel, het byvoorbeeld glad nie soos die karakter in sy kop gelyk nie. “Maar toe sy haar mond oopmaak, het ek geweet sy’s Lien.”
Lien word gespeel deur Carmen Pretorius, wat in teaterkringe bekend staan as die Prinses van Pantomime, vertel Liezl Steffens, die produksiekoördineerder. Sy was Cinderella in Janice Honeyman se onlangse produksie en het ook M-Net se High School Musical-wedstryd gewen.” Bekende akteurs betrokke is Franci Swanepoel, Hykie Berg en Elize Cawood as die verslonsde Roos. André Odendaal is die regisseur.
Verfilming behoort teen 20 Maart klaar te wees en die fliek behoort in Junie uitgereik te word