Elle op vingers getik
2012-02-09 22:27
- Artikelopsies
- Deel
- Kry Volksblad op
JOHANNESBURG. – Die Australiese supermodel Elle Macpherson is gister erg deur Suid-Afrikaanse Twitter-gebruikers op die vingers getik weens ’n vroeëre uitlating dat sy renosterhoring gebruik het.
Macpherson het dié omstrede uitlating in 2010 in ’n Twitter-onderhoud met The Sunday Times gemaak, berig The Telegraph.
Sy is gevra hoe renosterhoring proe en haar antwoord was: “’n Klein bietjie soos verpoeierde been en fungi in ’n kapsule. Dit werk.”
Macpherson is destyds ook oor dié stelling gekonfronteer en het die volgende dag ’n verklaring uitgereik waarin sy dit duidelik maak dat sy gekant is teen enige aktiwiteit wat die posisie van beskermde of bedreigde spesies in gevaar stel.
“Me. Macpherson het nie bewustelik enige produkte van bedreigde spesies gebruik of dit aangemoedig nie. Sy is jammer dat ’n gekskeerdery in ’n onderhoud, wat uit konteks aangehaal is, uiteindelik aanstoot gegee het.”
’n Internetartikel oor dié debakel is vandag onder meer deur die joernalis Gus Silber getwiet.
Macpherson het op onder meer die rugbyskrywer Brenden Nel se twiet geantwoord: “Ek het herhaaldelik getwiet dat ek nie renosterhoring gebruik nie.”
Nel het gesê: “Vreemde storie, jy moet besef dit is ’n baie sensitiewe saak in Suid-Afrika. Renosters word by die honderde doodgemaak.”
- Volksblad