Bobby van Jaarsveld sexyste man in SA
2012-02-03 21:56
JOHANNESBURG. – Bobby van Jaarsveld het eers gedink hy hoor verkeerd toe hy eergisteraand as Cosmopolitan se sexyste man van die jaar in Suid-Afrika aangewys is.
Lesers van die vrouetydskrif het 13 mans benoem vir die titel en kon dan per SMS vir hul gunsteling stem.
Bobby (24) het die meeste stemme gekry en weggestap met die titel en R10000.
“Dit is wonderlik,” het hy gister aan Volksblad gesê terwyl hy verleë gelag het.
“Toe hulle gepraat het van ’n sanger het ek nie onmiddellik besef hulle praat van my nie. Hulle (die organiseerders) moes ’n tweede keer vir my sê ek het gewen.”
Bobby se kompetisie het die Survivor: Maldives-deelnemer Lukhanyo Nontshinga, die Top Billing-aanbieder Janez Vermeiren en die sewes-rugbyspelers Neil Powell en Chris Dry ingesluit.
Bobby en sy vrou, Annatjie, se seun, Sion, is nou drie maande oud en die sanger sê hulle kry nie veel geslaap nie.
Nietemin maak hy seker hy kom drie keer ’n week by die gimnasium uit en hy hou maar dop wat hy eet – veral nie stysel en suiker nie. – Janice Keogh
- Volksblad