Werksaamhede by landdroshof ontwrig

Werksaamhede by die Bloemfonteinse landdroshof is gister ontwrig deurdat ongeveer 50 administratiewe werkers besluit het om te staak.

Dié tolke, klerke en ander personeel is ontevrede omdat hulle steeds nie vergoed is vir die oortydwerk wat hulle tydens die Wêreldbeker-sokkertoernooi in die sogenaamde Fifa-howe verrig het nie. Werknemers in die howe het toe daagliks van 07:45 tot 23:00 gewerk.

Daar is ook ontevredenheid omdat die werkers glo ingelig is dat hulle nie, soos ooreengekom is, teen ’n spesiale daaglikse bedrag vergoed sal word nie, maar volgens die bepalings van die basiese vereistes van indiensneming, wat bepaal hulle mag nie sonder spesiale vergunning meer as vier uur per dag oortyd werk nie.

Omdat daar nie skriftelike bewys van so ’n vergunning is nie, sou almal dus slegs vir vier uur van elke dag wat hulle gewerk het, vergoed word.

Die hofpersoneel het gisteroggend in kamer 103 van die landdroshof vergader en volgens ’n e-pos van ’n bestuurslid, kon howe 19 en 20, asook die Batho-hof, gevolglik nie gister enige sake aanhoor nie.

Betalings vir getuies kon ook nie uitbetaal word nie, omdat die beamptes verantwoordelik hiervoor ook gestaak het.

In die e-pos waarsku die bestuurslid die werkers dat hul staking onwettig is en dat teen hulle opgetree sal word.

Gistermiddag omstreeks 15:00 het afgevaardigdes van die departement van justisie die ontevrede werkers besoek en belowe dat die departement teen volgende week hul griewe sal aanpak.

Hulle sal ook volgens die oorspronklik ooreengekome voorwaardes vergoed word.

- Volksblad