Wending in VS se padkrisis
2012-02-10 22:04
- Artikelopsies
- Deel
- Kry Volksblad op
DIE maatskappy MRD Consulting Engineers (Edms) Bpk is nie gelys by die Kommissie vir Maatskappye en Intellektuele Eiendom (CIPC) nie en bestaan waarskynlik nie.
Die besigheidsadres, Jansenlaan 1 in Germiston, is volgens Google Maps ’n stuk oop veld.
MRD Consulting Engineers is die “maatskappy” van die omstrede tenderpreneur mnr. Jacob Dladla, en het ’n multimiljoenrandse kontrak by die Vrystaatste departement van polisie, paaie en vervoer gekry.
Dladla is slegs ’n direkteur van twee maatskappye, Ensemble Trading 295 en Pmplus Projects Strategy Consultants.
Dit is nie bekend in watter sektor die maatskappye besigheid doen nie.
Hy het bedank as direkteur van twee bourekenaar-maatskappye.
MRD is gekontrakteer as projekbestuursmaatskappy vir 12 van die omstrede 23 paaie wat herstel sou word in die provinsie.
Die herstelwerk aan dié 12 paaie sou R1,9 miljard beloop en werk aan die paaie is gestaak.
Daar was na bewering grootskeepse tenderbedrog met die aanstelling van MRD.
Dladla het glo van die kontrakteurs verwag om ’n “fooitjie” te betaal ten einde die kontrakte te kry.
Dladla, ’n voormalige munisipale bestuurder van die Mbombela-munisipaliteit in Nelspruit, is skuldig bevind aan aanklagte van bedrog wat onder meer verband hou met tenderongerymdhede met die bou van die stadion daar vir WB 2010.
Ná ’n lang arbeidsgeding het Dladla en die munisipale raad geskik.
Dladla is toe vort met ’n goue handdruk van meer as R1,5 miljoen.
Die oud-polisiekommissaris mnr. George Fivaz se Ramathe Fivaz Forensiese en Ondersoekende Rekenkundige Dienste het die beweerde tenderbedrog met die 23 kontrakte ondersoek.
Na verneem word, word in dié verslag, benewens grootskeepse bedrog, onthul dat Dladla miljoene in ’n Amerikaanse bankrekening het wat glo uit die Vrystaatse staatsgeldkas kom.
Die verslag sal binnekort voor die provinsiale uitvoerende komitee dien.
Daarna sal dit aan die ouditeur-generaal (OG) oorhandig word.
Die OG sal dit dan aan die staande komitee vir openbare rekeninge (Skoor) oorhandig wat dit daarna aan die publiek sal bekend maak.
Toe Volksblad gister Dladla om kommentaar nader, het hy sonder om ’n woord te sê die foon doodgedruk.
- Volksblad