Vrou swaar gestraf ná hondjie se lyding
2012-02-09 22:26
- Artikelopsies
- Deel
- Kry Volksblad op
KRUGERSDORP. – Die streekhof hier het gister een van die swaarste vonnisse nóg wat die Dierebeskermingswet toelaat, opgelê aan ’n vrou van die Wes-Rand wat haar verminkte Jack Russell-hondjie vir minstens langer as 24 uur laat ly het sonder om vir hom behandeling te kry.
Me. Cora Bailey, stigter van die diereregtegroep Community Led Animal Welfare (Claw), het die hondjie, Jack, in 2009 uit me. Antoinette van Wyk (34) se oprit gered nadat ’n buurvrou haar om hulp geskakel het.
Jack se been was volgens Bailey uit sy heuppotjie geskeur, nadat hy vroeër vermoedelik deur ’n motor raakgery is. Hy kon volgens ’n veearts selfs al ’n maand voordat hy gehelp is, raakgery gewees het.
Die besmette wond, wat teen daardie tyd deurtrek was van maaiers, was só erg dat die dier se heupbeen al afgeval het.
Bailey beweer Van Wyk het op die betrokke dag doodluiters in haar motor geklim en gery – ondanks die feit dat die hondjie duidelik in “ontsaglike pyn” was.
Verskeie Johannesburgse veeartse het dae lank geworstel om Jack se lewe te red, maar daar is uiteindelik besluit om hom van kant te maak nadat sy niere ingegee het.
Streeklanddros J. Nortjé het Van Wyk tot 12 maande tronkstraf én ’n R5000 boete gevonnis.
Van Wyk se omstandighede as die enkelma van drie jong kinders het Nortjé die tronkstraf vir vyf jaar laat opskort. Sy moet egter steeds die boete afbetaal en hy het haar boonop ’n verdere vonnis van 12 maande korrektiewe toesig opgelê, waartydens sy ook naweke gemeenskapsdiens moet verrig.
Van Wyk sal haar ook aan voorgeskrewe programme en terapie moet onderwerp en mag nie vir die volgende jaar alkohol of voorskrifmedisyne gebruik nie. Sy is ook onbevoeg verklaar om ’n vuurwapen te besit en mag ook geen diere aanhou nie. Sy mag nie met haar gemeenskapsdiens met diere werk nie.
Mnr. Martin van Vuuren, Van Wyk se regsadviseur, het ná die verrigtinge gesê sy kliënt het ten tyde van Jack se dood baie persoonlike probleme ondervind.
Volgens Van Vuuren het Van Wyk in 2009 haar werk verloor, het sy aan baie stres gely en uiteindelik ’n maagseer ontwikkel, pynmedikasie gebruik en is sy gevolglik die dag nadat Bailey Jack probeer red het, in die intensiewesorgeenheid van die Krugersdorp-hospitaal opgeneem.
Bailey en me. Miranda Jordan, woordvoerder vir die drukgroep People for the Liberation of Animals (PLA), het gesê hulle voel bemoedig deur die vonnis.
Jordan het bygevoeg dat PLA hulle in die toekoms daarvoor sal beywer vir wetswysigings sodat oortreders vonnisse van tot vyf jaar tronkstraf en boetes van tussen R20000 en R50000 opgelê word vir erge dieremishandeling.
- Volksblad