Verkrag-hel
2010-03-19 01:13
VIRGINIA. – Onbeskryflike trauma, skok en vernedering.
Só beskryf ’n jong man van Virginia sy ervaring Sondagaand toe hy op die dorp oor die kop geslaan, by die rivier verkrag en toe met takke en gebuigde riete onsedelik aangerand is.
Mnr. Willie Meintjes (34), ’n selferkende gay man, is omstreeks middernag deur sy broer en suster bewusteloos, bebloed en nakend by die rivier gekry, met sy hande agter sy rug vasgemaak en sy hemp oor sy kop getrek.
Hy kry nou intensiewe sielkundige behandeling, asook antiretrovirale middels.
Meintjes en sy ma, Willemien, sê hy het op die dorp grootgeword en bly al 34 jaar daar sonder dat hy vyande het of dat iemand hom al oor sy seksualiteit gekonfronteer het.
“Ek het uit die hospitaal gehardloop toe ek my kind met die takke en riete in sy lyf sien. Jy kan dit vir niemand beskryf nie. Hy het ophou asemhaal en hulle moes hom red,” sê mev. Meintjes.
Willie, ’n kroegman by die Harmony-rugbyklub, sê hy en sy vriendin het Sondagaand in die kroeg onder sy woonstel woorde gehad. Hy het vir hom sigarette gaan koop en gaan stap om te kalmeer.
By ’n verkeerslig naby die woonstel het hy geen kar gehoor of gesien nie, maar is hy skielik van agter oor die kop geslaan.
Hy het sy bewussyn verloor en eers by die rivier, waar hy reeds vasgebind was, wakker geword.
Hy het begin skreeu en een van drie of vier mans, wat almal klapmusse opgehad het, het sy hand in Willie se gesig gedruk. Hy kon toe sien dit is die hand van ’n blanke man met ’n tatoeëermerk van ’n kruis op sy pols.
Hy het probeer wegkom, maar is hard met die vuis geslaan en het weer sy bewussyn verloor. Hy het in die hospitaal wakker geword.
Daar moes ’n dokter die takke en riete uit sy lyf verwyder.
Sy regterknie is beseer, hy het ligte harsingskudding en sy hele lyf is oortrek van rou skaafwonde. Verder is daar diep snye aan sy polse waar sy hande met kabels met skerp sykante vasgemaak was.
Mev. Meintjes sê sy het teen 23:30 onraad gemerk toe Willie nie huis toe kom nie. Willie is die broodwinner wat saam met sy ma, suster en haar kind die woonstel deel.
Sy het haar ander seun en haar dogter gevra om te help soek.
Hulle is later na die rivier waar hulle gewoonlik visvang en het Willie net voor middernag daar gekry. Hulle het toe die polisie en ambulans ontbied.
Mev. Meintjes sê hoewel Willie baie gebloei het, vermoed hulle een van sy aanvallers is beseer en daar was van sy bloed ook. Die polisie het ook semenmonsters gekry.
“Hy slaap en eet nie, en as iemand vinnig naby hom beweeg, skrik hy.”
Enigiemand wat die polisie in die ondersoek kan help, word gevra om die polisie te kontak.
- Volksblad