UV tevrede met Jonathan Jansen ná 1 jaar
2010-07-29 04:10
- Artikelopsies
- Deel
- Kry Volksblad op
’n Jaar ná die aanstelling van prof. Jonathan Jansen as rektor van die Universiteit van die Vrystaat (UV), glo die UV dié instelling is op die regte pad.
Prof. Driekie Hay, vise-rektor: onderrig en leer, en mnr. Rudi Buys, studentedekaan, het gister aan Volksblad gesê die meeste van Jansen se beloftes en aankondigings verlede jaar is besig om te realiseer.
Reitz-kamerwonings gaan nie binnekort sy deure weer open nie. Buys sê hulle is gereeld in gesprek met die koshuishoof en primarius van die voormalige Reitz-kamerwonings, maar die gesprekke is “prosesmatig” en word bepaal deur die afhandeling van die Reitz-debakel.
Volgens Buys is die belofte aan eerstejaarstudente van ’n oorsese reis besig om in plek te val. “Die eerste groep eerstejaarstudente gaan in September oorsee om universiteite daar te besoek,” het Buys gesê.
Hay het erken daar is uitdagings waaraan nie aandag gegee is nie, weens ’n gebrek aan tyd.
“Ons het nog nie aandag gegee aan Sotho as onderrigtaal aan die UV nie,” het sy gesê.
Oor die standbeeld van oudpres. M.T. Steyn is daar nie ’n finale besluit geneem nie, maar “gesprekke” oor die beeld dui daarop dat dit nie meer lank reg voor die hoofgebou gaan staan nie.
Albei is egter positief oor die pad waarop die UV is.
“Watch ons oor vyf jaar,” het Hay gesê.
- Volksblad