UV-student sterf nadat hy glo sianied inkry

’n Student aan die Universiteit van die Vrystaat (UV) is gister in een van die UV se laboratoriums dood.

Mnr. Jaco Buys (23) sou aan die einde van die jaar sy magister-graad in plantwetenskappe verwerf.

Volgens kol. Annelie Wrensch, polisiewoordvoerder, het medestudente gehoor Buys maak vreemde geluide en gesien skuim kom by sy mond uit.

Paramedici van ER24 in die stad het hom op die toneel behandel en na die Bloemfontein-Medi-Clinic gebring.

Mev. Amanda Appelgryn, hospitaalwoordvoerder sê Buys is omstreeks 11:00 dood verklaar.

Wrensch sê leë sianied-botteltjies is op Buys se lessenaar gevind.

“Die polisie doen ’n geregtelike doodsondersoek, maar geen misdaad word vermoed nie.”

Volgens ’n toksikoloog aan die UV wat anoniem wil bly, is die uitwerking van sianied dodelik en baie vinnig. “Sianied verhinder die selle van die liggaam om suurstof in te neem. Simptome is erge naarheid, braking, hoofpyn en mense wat daarmee in aanraking kom, haal baie moeilik asem en verval ook vinnig in ’n koma.”

Sy sê ’n teengif-middel is beskikbaar wat die pasiënt, indien hy of sy vinnig genoeg bereik word, genoeg kan stabiliseer om na die naaste hospitaal te bring.

“Veral boere wat met dié gifstof werk, moet dit by hulle dra.”

Buys is oorspronklik van Copperton naby Prieska in die Noord-Kaap.

’n Baie hartseer mev. Riëtta Buys, sy ma, het gister aan Volksblad gesê sy sit met baie vrae.

“Ek kan dit nie verstaan nie. Oral waar hy gekom het, was hy gewild. Sy lewe het voor hom gelê.”

Buys sê Jaco was ’n wonderlike kind. “Hy het soveel ideale gehad wat hy self verwesenlik en sou verwesenlik het. Hy was baie gewild, veral onder ouer mense ook.”

Mnr. P.W. Oosthuizen, wat byna vier jaar saam met Buys in ’n studentehuis gebly het, stem saam.

“Buys, soos ons hom genoem het, was ’n interessante en intelligente mens. Dit het ’n rukkie gevat voordat hy jou sou toelaat in sy persoonlike ruimte, maar hy was verskriklik snaaks. Ons in die huis het ons gereeld ge-can vir sy humor.” Hy sê Buys het glad nie die afgelope tyd anders opgetree nie.

Volgens Oosthuizen was “Buys ’n aangename ou om te ken. Hy was geweldig doelgerig en gedrewe, veral wat sy studie betref.”

Buys word oorleef deur sy ma, sy pa en sy 20-jarige suster, Zandria.

- Volksblad