Twee vroue in Welkom verkrag

WELKOM. – ’n Jong vrou is hier om die beurt deur 16 mans verkrag en ’n tweede, getroude vrou se man is erg aangerand toe hy met haar probeer vlug het. Sy is toe tog ook deur hul aanvallers verkrag.

Die egpaar het in hul motor naby ’n ou mynskag in Welkom geslaap omdat hulle haweloos is.

Bewerings word ondersoek dat die verkragters almal Lesotho-burgers is.

Kapt. Stephen Thakeng, polisiewoordvoerder, sê die 24-jarige vrou wat deur die groep verkrag is, is by die Freddies-goudmyn se nr. 5-skag, waar sy geloop het, deur die mans oorval.

Die 16 mans het beurte gemaak om haar te verkrag, waarna hulle haar daar in die veld gelos en weggeloop het. Sy kon een van die mans aan die polisie identifiseer en hy is in hegtenis geneem. Die ander 15 is nog op vrye voet.

Enigiemand wat die polisie in die ondersoek kan help, word gevra om lt. Mosele Mokeyane by 057-391-6186 te bel.

Thakeng sê tydens die tweede voorval is die 27-jarige man van ’n 22-jarige vrou erg met pype geslaan toe hy sy vrou probeer beskerm het. Die egpaar het by die man se broer gebly totdat hy hulle gevra het om die huis te verlaat. Die eerste aand het hulle in hul motor agter ’n supermark in die woonbuurt Sandania geslaap, en die tweede aand by die ou Pres. Brand-goudmyn.

Iemand, wat homself as ’n sekuriteitsbeampte voorgestel het, het aan hul motorruit geklop en gesê hulle mag nie daar wees nie. Die volgende oomblik het nog twee mans bygekom en die motorruit met klippe stukkend geslaan. Die man se gesig is deur die glas beseer en hy het probeer wegjaag. Die motor het egter vasgeval en toe hy uitklim om die motor te stoot terwyl sy vrou bestuur, is hy oorval en aangerand.

Een van die drie mans het die vrou daarna verkrag.

Enigiemand met inligting word gevra om ao. Moyane Monei by 083-533-6375 te bel.

- Volksblad