Tant Hettie trap dat dit klap
2012-02-03 21:55
DIE ander inwoners van die aftreeoord noem haar “Die Vrou op die Fiets”.
Op die rype ouderdom van 84 laat mev. Hettie Theron die speke sing soos sy die strate van die Westerbloem-aftreeoord in Bloemfontein plattrap.
Al wat haar van haar fiets af kry, is die hongerpyne.
Theron sê sy ry al 12 jaar lank fiets.
Dit het begin toe sy en haar oorlede man, Japie, in die aftreeoord kom nesskop het.
“Ek en my man het destyds elke aand op ons fietse geklim en die strate van die oord ingevaar vir ’n bietjie ontspanning.”
Dit was destyds egter nie net van opklim en ry vir haar toe hulle hier ingetrek het nie.
“Hulle sê jy verleer nie fietsry nie, maar ek het.
“Ek het my pimpel en pers geval, terwyl my man net op die fiets geklim en gery het.”
Die vallery het ook net ’n rukkie geduur. Toe het die fietsry-gogga haar behoorlik beet.
As sy eers ry, wil sy nie ophou nie.
Vir afwisseling het sy ’n klomp verskillende roetes.
Dit is eers as die honger haar behoorlik dwing, dat sy besluit om huiswaarts te keer.
Theron het 40 jaar lank aërobiese klasse in kerk- en skoolsale in Bloemfontein aangebied.
Sy het ander gehelp om fiks en gesond te wees.
Nou bly sy fiks en gesond met haar pienk Raleigh-fiets.
- Volksblad