‘Skatryk, vaal vroutjie’ vat toe Sandra se man
2012-02-08 22:20
- Artikelopsies
- Deel
- Kry Volksblad op
JOHANNESBURG. – “’n Skat- ryk, vaal vroutjie uit een van Swede se invloedrykste families” het die verhouding van die aktrise Sandra Prinsloo en haar lewensmaat van sewe jaar, prof. Willem van Riet, laat verbrokkel.
Die vrou se broer bly in Nederland, waar hy goeie vriende met lede van die koningsgesin is.
Eergister wou Prinsloo niks oor die vrou, aan haar net bekend as Evelene, sê nie.
Gister het sy aan haar boesemvriend mnr. Jan Groenewald, eienaar van die Foxwood House-boetiekhotel in Johannesburg, toestemming gegee om namens haar met Volksblad daaroor te praat.
Sy self wou nie praat nie omdat sy verkies om nie in ’n “moddergooiery” betrokke te raak nie.
Van Riet, wat in Maart 70 word, het eergister ontken dat ’n ander vrou betrokke is en gesê sy en Prinsloo se vol programme het hul verhouding gekelder.
Daaroor was Prinsloo gister baie ontsteld, “omdat ons vol dagboeke absoluut niks met ons verbrokkelde verhouding te doen het nie”.
Groenewald en Prinsloo is al 20 jaar lank vennote in ’n rolprentvervaardigingsmaatskappy.
“Ons is mekaar se heel beste vriende,” is hoe hy hul verhouding beskryf.
“Willem het in Swede as omgewingskonsultant betrokke geraak by verskeie omgewingsprojekte, onder meer die stigting van ’n vredespark.
“Hy het Evelene toe ontmoet, want sy is die voorsitter van dié projek. Ek neem aan ek spel haar naam reg, want ek kan nie Sweeds praat nie.
“Hoewel Sandra in die laaste maande agterdogtig was, het sy op 23 Desember eers uitgevind dat Willem en die vaal vroutjie al 18 maande in ’n verhouding is. Sy het Willem op dié dag daarmee gekonfronteer.
“Volgens Sandra was sy antwoord: ‘Hoe kan ek haar nou los? My grootste droom sal aan stukke spat. Sy maak vir my deure oop.’”
Volgens Groenewald het Prinsloo toe vir Van Riet gevra om hul huis op Kalkbaai te verlaat.
“Willem is toe na sy huis op Stilbaai. Skaars tien dae later het Evelene daar by hom gaan kuier,” het Groenewald gesê.
Van Riet het nie gister op verskeie stempos- en SMS-versoeke om kommentaar op dié stellings gereageer nie.
- Volksblad