Sewe slagoffers was helde sê polisieshoof

PRETORIA. – Dit is sewe helde wat op “Swart Vrydag” dood is.

Só het genl. Bheki Cele, polisiehoof, die polisielede wat verlede week in ’n helikopterongeluk dood is, gister hier op hul roudiens beskryf.

“Hierdie organisasie (die polisie) sal as beskermer van die weeskinders en as pa vir die weduwees optree. Ons sal na dié gesinne kyk.”

Cele was gister ’n jaar lank in sy pos. Hy het gesê hy wou dit regtig nie so “gevier” het nie.

Die helikopter waarmee die sewe lede van die polisie se nasionale intervensie-eenheid en lugvleuel na ’n rooftog in eMalahleni (Witbank) op pad was, het in Pine Ridge naby die Klarinet-plakkerskamp neergestort.

Mnr. Driaan Gouws, wie se broer Tinus die medevlieënier was, het ná die diens gesê: “Suid-Afrika het vir ’n oomblik stilgestaan met die nuus oor die dood van sewe polisielede.”

Mnr. Nathi Mthethwa, minister van polisie, se woorde was: “Vrydag het Suid-Afrika en die polisiemag armer geword.”

Sowat 2?500 mense, onder wie talle polisie- en weermaglede, het die diens bygewoon.

Toe lede van die Gouws-familie by die Hatfield Christian Church inkom, was ao. Gouws se foto die eerste ding wat hulle gesien het. Hulle het by die foto stilgestaan en kon nie hul trane keer nie.

Sy ma, Doris, het net na die foto gestaar en huilend herhaal: “Dis my seun, dis my seun.”

Ao. Marlise Henning, weduwee van sers. Kobus Henning, het gesê hul sewe weke oue babaseuntjie sal weet watter legende sy pa was. “Hy was ’n wonderlike man, ’n liefdevolle pa en bo alles ’n ongelooflike polisieman.”

Mnr. Johan Henning het met trane in sy oë hulde aan sy seun gebring. “Hy wou nog altyd ’n polisieman gewees het en dit is vir ons as familie die seerste seer om te verwerk.”

Kapt. Wickus Zaayman se pa, Phillip, het gesê al wat sy seun ooit wou doen, was om te vlieg.

“Dit was sy grootste passie in sy lewe. Hy het altyd gesê as hy moet doodgaan, sal hy verkies om in sy vliegtuig dood te gaan en dit het toe gebeur.”

Zaayman jr. sou op 9 Oktober met me. Janine Croucamp getrou het. Zaayman was die vlieënier wat Cele en genl. Arno Lamoer, hoof van sigbare polisiëring, na die WB2010-openingsgeleentheid geneem het.

Hy was ook een van die helde in die Mosambiekse oorstromings van 2006 waar hy ’n kind uit die water gered het.

Kol. Percy Madunda, bevelvoerder van die intervensie-eenheid, was volgens sy vrou, Thol-wana, die perfekte pa en eggenoot en het sy drie kinders bitter lief gehad. Die jongste van dié kinders is maar twee maande oud.

Die ander oorledenes is ao. Colin Edward Davids en Dirk van Aswegen en sers. Daniël de Bruin.

In sy huldeblyk het Lamoer gesê: “Hulle is dood op die manier waarop hulle gewerk het, besig om misdaad te beveg.

“Terwyl ons oor die dood van die lede rou, jubel die engele agter die gordyn.”

Cele se laaste woorde aan sy gesneuwelde kamerade was: “Gaan en rus nou veilig, julle het jul werk goed gedoen en weet net dat ons almal julle verskriklik gaan mis.”

- Volksblad