Seun se herstel ná ongeluk verstom

WELKOM. – Enkele dae nadat hy uit ’n koma van bykans twee weke wakker gemaak is, het Michael van Greunen (16) so wonderbaarlik herstel dat hy al self kan loop.

Michael, ’n hoërskoolseun van Welkom, is die enigste oorlewende van die grusame ongeluk op 22 Januarie waarin sy boesemvriend Ettienne Kahts (15) en ’n kennis, Mark Lambrechts (15), dood is.

Michael het ’n baie ernstige kopbesering opgedoen en moet nou intensiewe terapie kry. Hy sal voor die tweede skoolkwartaal geëvalueer word om te sien of hy dan sal kan teruggaan skool toe.

Michael se ma, Yvonne, sê sy het hom verlede week, twee dae nadat hy deur dokters uit die koma wakker gemaak is, van Ettienne se dood vertel. Dit was vir hom ’n groot skok en hy is baie hartseer.

Sy sê hy onthou egter niks van die ongeluk nie. “Hy onthou hy was saam met my en Ettienne, wat by hom sou kom oorslaap, by die musiekfees in Koppie-Alleenweg. Daarna onthou hy niks.”

Die twee seuns het Mark by die musiekfees ontmoet en besluit om by sy ouerhuis te gaan oorslaap. Daar het Mark sy pa se bakkie gevat en die seuns was vermoedelik na ’n winkel op pad om hoofpynpille te gaan koop toe die botsing met ’n ander voertuig plaasgevind het.

Michael kon, nadat hy wakker geword het, glad nie loop nie, maar is nou so sterk dat hy net by trappe hulp nodig het. Daarby is sy een oog en spraak ook aangetas. Daar is geen permanente skade nie.

Van Greunen sê hulle het geweldige ondersteuning en goeie diens van ER24-ambulanspersoneel, Mediclinic Welkom én Mediclinic Bloemfontein en dr. Petrus Stone, neuroloog, gekry. “Ons moet ook vir sy skoolhoof, mnr. Gunther Hinrichs, personeel van HTS Welkom, en sy maats baie dankie sê.”

- Volksblad