Respek vir Grondwet verblydend, sê regter Goldstone
2012-02-03 21:55
DAAR is rede tot kommer dat die demokrasie in Suid-Afrika in ’n sekere mate besig is om te verswak, maar dit is verblydend dat die letter en die gees van die Grondwet en die Handves van Menseregte tog deur regeringsvlakke gerespekteer word.
Politieke spanning in regeringskringe is nie uniek aan Suid-Afrika nie en struwelinge op regeringsvlak van talle ander demokrasieë vind voortdurend plaas.
Só het regter Richard Goldstone, oudregter van die grondwethof en menseregte- en internasionale juris, gister in Bloemfontein gesê toe hy ’n eredoktorsgraad van die Universiteit van die Vrystaat (UV) ontvang het.
Goldstone is op die amptelike opening van die UV vir sy bydrae tot die ontwikkeling van internasionale regspleging en sy uitsonderlike regsloopbaan vereer.
Hy het op dié spoggeleentheid, wat deur onder andere mnr. Richard Freedman, die direkteur van die South African Holocaust and Genocide-stigting, en regter Mahube Molemela van die Vrystaatse hooggeregshof bygewoon is, gesê Suid-Afrika het sedert 1994 groot vordering op die gebied van transformasie gemaak.
“Die transformasie van ons land is daar vir almal om te sien en ons moet dié veranderinge nie as vanselfsprekend aanvaar nie, maar eerder daarna streef om ’n groter bydrae te lewer.”
Regter Goldstone het egter die gebrek aan hulpbronne in die Suid-Afrikaanse regstelsel as kommerwekkend bestempel.
Hy het gesê dit is skokkend dat landdroshowe dae lank gesluit word, terwyl reg en geregtigheid moet geskied.
Regter Goldstone het reeds 26 eregrade van oor die wêreld heen verwerf, maar het gesê dit is goed en ’n groot eer om deur die UV in sy eie land vereer te word.
“Ek het al baie jare reeds ’n goeie en gelukkige verhouding met die UV.”
Regter Goldstone het van 1995 tot 2003 in die grondwethof gedien en was voor dit op die bank as regter in die hooggeregshof en die appèlhof in Bloemfontein.
Hy het onder meer in 1994 die eerste hoofaanklaer geword van die Verenigde Nasies (VN) se internasionale tribunale wat oorlogsmisdade verhoor het.
Prof. Jonathan Jansen, UV-rektor, het gesê regter Goldstone is die internasionale gesig van Suid-Afrika in strafreg.
“Daar is niemand beter as regter Goldstone, naas oudpres. Nelson Mandela, om ons land op internasionale vlak te verteenwoordig nie.”
- Volksblad