Pa van 3 in rooftog

BETHLEHEM. – ’n Veiligheidswag van die dorp en pa van drie klein kinders is gisteroggend koelbloedig in ’n rooftog in Phuthaditjhaba, Qwaqwa, doodgeskiet.

Mnr. Willie Simpson (41), ’n werknemer van Coin Security se Bethlehem-tak, en een van sy kollegas was met die onderneming se voertuig by die Shell-vulstasie waar ’n mens van Bethlehem in Phuthaditjhaba aankom.

Sers. Mmako Mophiring, polisiewoordvoerder, sê vier gewapende mans het Simpson en sy kollega aangeval.

Een van die rowers het geskiet en die koeël het Simpson se lyf onder sy arm getref. ’n Ambulans is ontbied, maar Simpson is later dood verklaar.

Sy kollega is na ’n plaaslike dokter gebring en vir skok behandel.

Die rowers het met ’n onbekende bedrag geld in ’n wit Opel Monza met ’n Vrystaat-registrasienommer gevlug.

Die rowers het die voertuig later in Phuthaditjhaba gelos en in ’n groen Audi sonder ’n registrasienommer gevlug.

Die polisie het intussen uitgevind dat ’n man van Bolata in Qwaqwa vroeër van die Opel Monza beroof is.

Een skoot is ook op dié man geskiet, maar die koeël het hom gemis.

Familielede van Simpson was gister nog te geskok om met Volksblad te praat en ’n foto van die oorledene kon ook nie gister van die familie gekry word nie.

Simpson word deur sy vrou, Lana, en drie kinders, Maroné (9), W.G. (4) en Danica (2), oorleef.

Hy het nagenoeg vyf jaar by Coin Security se Bethlehem-tak gewerk.

Volgens die onderneming kom Simpson se dood vir almal as ’n groot skok. Personeellede ondersteun mekaar.

Simpson was ’n goeie werker en ’n mens kon altyd op sy knoppie druk. Boonop het sy kollegas ook baie van hom gehou.

Mophiring sê niemand is al in hegtenis geneem nie.

Die polisie ondersoek klagte van moord en poging tot moord, asook twee klagte van gewapende roof.

Enigiemand met inligting wat die polisie in hul ondersoek kan help, kan kapt. Daniel Moshoaduba van Phuthaditjhaba se eenheid teen georganiseerde misdaad by 082-854-7540 of 0860-010111 bel.

- Volksblad