Nag van bloed op hoewes

Bloemfontein

’n Nag van bloed in Bainsvlei is onthul ná die dood van ’n man wat in ’n reeks aanvalle deur besope rowers “geslag” en die letters “ANC” met messe op sy rug uitgekerf is.

Vier mans het ná ’n drinksessie die aand van 23 Desember op ’n beweerde moord-en-verwoestingstog op die hoewes gegaan en ook ’n vrou en haar 14-jarige seun keelaf gesny, die pa in die hart gesteek en ’n buurvrou vyf keer in die rug gesteek.

Mnr. Moses Nthloka (sowat 60), die man op wie se rug die letters “ANC” uitgekerf is, is dié week in die Pelonomi-hospitaal dood. Hy het nooit sy bewussyn herwin nie.

Kapt. Chaka Marope, woordvoerder van die polisie, sê die mans het ná ’n drinksessie op ’n misdaadtog in Bainsvlei vertrek. Altesaam 17 misdade binne ’n paar uur word met hulle verbind.

Dié misdade sluit in drie moorde, ’n verkragting, huisbraak, poging tot moord, roof en aanranding met die doel om ernstig te beseer.

“Hulle het elke mens aangeval sover soos hulle geloop het en by huise ingebreek.

“Hulle was dronk. Om fees te vier is een ding, maar ’n mens doen dit nie op ’n barbaarse manier nie,” het Marope gesê.

Nadat Volksblad, susterkoerant van Die Burger, Nthloka se dood bevestig het, is die moordbende se spore gister gevolg.

Die vier het om middernag op die werkershuise op Hoewe 2, Saaimanweg, toegeslaan.

Mnr. Jacob Nokgedi (45) sê die deur is oopgeskop. Die vier mans het op Tswana geld geëis en toe berserk geraak.

“Hulle het net begin donner. Hulle het my eerste gesteek (vier steke in die sy regoor die hart en in die nek).

“Toe sny hulle my vrou, Martha van Wyk, keelaf.

“Sy is net daar dood, saam met my kind, Desay (14).

Hy het probeer help, toe sny hulle ook sy keel af. Ek het gehoor hoe steek hulle. Toe f–f hulle.

“Hulle het niks gesê nie, net my skoene gevat. Dis my nuwe skoene wat ek vir Kersfees gekoop het.”

Sy dogter, Sanna (24), het hulp gaan soek terwyl die vier op die huis van mev. Lydia Modise (52) toegeslaan het.

Modise se seun, Petrus, is met ’n yster oor die kop geslaan.

“Sy het die geraas gehoor en uitgegaan. Die vier het geld gesoek en toe sy sê sy het niks nie, het hulle haar ‘gevang’.

“My arms is bó my kop vasgehou en ek is met ’n mes van agter gesteek. Ek is vyf keer in die rug en arms gesteek.”

Nthloka, haar swaer, is daarna in die pad gekry en “geslag”.

Mnr. Samuel Sethlare, sy broer, sê mense het hom vir dood langs die Dealesville-pad gekry. Hy is in die kop, lyf en bene gesteek.

Op sy rug is die letters “ANC” uitgekerf, maar niemand weet hoekom nie.

 - Die vier mans wat in hegtenis geneem is, is mnre. Jacob Gatrey (25), Daniël Mahloko (27), Itemeleng Maruma (22) en Amos Nkaba (32).

Hulle word in die Grootvlei-gevangenis aangehou en verskyn op 28 Januarie in die Bloemfonteinse landdroshof, waar hulle om borgtog aansoek sal doen.

- Volksblad