Moordverhoor teen tweeling stort in duie

DIE moordverhoor teen die bekende Lekone-tweeling van Heidedal het gister in die Vrystaatse hooggeregshof in duie gestort toe die getuienis van een van die staat se belangrikste getuies op die moordaanklag wesentlik van haar weergawe in haar polisieverklaring verskil.

Mev. Kedibone Palatse is net nadat haar getuienis afgehandel is op ’n aanklag van regsverydeling in hegtenis geneem.

Adv. Sophie Giorgi, vir die staat, het daarna voor regter Ian van der Merwe gesê sy gaan geen verdere getuienis teen mnre. Keabecoe en Kegomodicoe Lekone oor die aanklagte van moord, regsverydeling en onwettige besit van ’n vuurwapen en ammunisie aanbied nie. Luidens haar polisieverklaring was Palatse ’n ooggetuie van hoe konst. Lehlohonolo Seqhee (31), lyfwag van mnr. Seiso Mohai, destyds LUR vir openbare werke, paaie en vervoer, in die vroeë oggendure van 18 Augustus 2008 buite die restaurant en kroeg Ekhayeni Pub and Grill van die Lekones in Bochabela doodgeskiet is.

Gister het sy getuig daardie inligting is wat sy van ander mense gehoor het. Hoewel sy op elke bladsy van die verklaring geteken het, is dit nie weer met haar deurgegaan nie en ook nie aan haar teruggelees nie. Dit is ook nie in haar teenwoordigheid beëdig nie.

Toe Giorgi aan haar stel dat sy self die verklaring verlede week met haar deurgewerk het, het Palatse getuig dat hulle net oor die gebeure van daardie aand gepraat het.

Giorgi gaan Maandag, wanneer die verhoor voortgesit word, getuienis lei oor ’n aanklag van meineed teen die Lekones. Die staat beweer hulle het in hul borgtogaansoek onder eed gelieg.

- Volksblad