Mikayla opgewonde huis toe
2012-01-27 22:22
Fanie van Rooyen en Antoinette Pienaar
DIE vyfjarige meisie wat in Desember deur ’n Mosambiekse spoegkobra gebyt is, was gister só bly om uit die hospitaal ontslaan te word dat sy met haar seer, verbinde been uit haar stootwaentjie geklim het om self vinniger by die motor te kom.
Mikayla Robbertse is ontslaan nadat die operasie om haar linkerhandjie van haar linkerbeen los te maak, vroeër dié week ’n sukses was.
Dié handjie is ’n paar weke gelede aan haar lies vasgewerk in ’n poging om die weefselskade bo-op te herstel.
“Ek gaan huis toe!” het ’n baie opgewonde Mikayla, van Lephalale (Ellisras), keer op keer by die ingang van die Steve Biko- akademiese hospitaal in Pretoria herhaal aan enigeen wat wou luister.
Sy het gesê haar hand is nie meer seer nie, maar haar been, waarvan die wond gister skoongemaak is, is nog seer.
Haar ouma, mev. Charmain Robbertse, het gister gesê sy kan nie wag om Mikayla weer vir haarself te hê nie.
“Ek is só bly sy kom huis toe sodat ek haar kan vertroetel en sodat ons weer in ’n roetine kan kom,” het Robbertse gesê.
Die liesflap-tegniek is vroeg in Januarie op Mikayla uitgevoer nadat dooie weefsel vroeër uit haar hand en voorarm verwyder is.
Die gif van ’n Mosambiekse spoegkobra werk baie soos dié van ’n pofadder. Dit veroorsaak weefselnekrose wat daartoe kan lei dat dokters maande lank dooie weefsel, selfs weg van die bytwond, moet wegsny.
Die weefselskade aan Mikayla se hand was so groot dat die ligamente ontbloot was.
’n Flap bestaande uit vel, onderhuidse weefsel en bloedvate is uit die lies gesny. Dit was net aan drie kante los met die vierde kant nog vas aan die lies vir bloedtoevoer.
Mikayla moes die hand die laaste weke baie stil hou om te keer dat dit nie losgaan nie.
Die operasie om die hand los te maak, het sowat ’n uur en ’n half geduur.
Robbertse het gesê Mikayla sal nou in Lephalale met fisioterapie begin en elke Donderdag vir opvolgbesoeke na Pretoria terugkeer. “Oor so ses maande sal die dokters dan verdere rekonstruksie doen omdat die arm nog nie mooi lyk nie. Dit is bedek, maar daar het baie gate ingeval.”
Mikayla sien volgens haar ouma veral daarna uit om haar Pekinese hondjie, Jimmy, wat glo soos die bokser Jimmy Abbott lyk, weer te sien.
“Daar wag ook vir haar ’n verwelkomingspartytjie as sy by die huis kom, so die opgewondenheid is groot,” het Robbertse gesê.
Mikayla laat blyk ook geen slangvrese nie.
“Haar gunstelingboek is nou een oor slange.”
- Volksblad