‘Mighty Men’ nou amptelik handelsmerk

PRETORIA. – Die Greytownse evangelis mnr. Angus Buchan het die naam Mighty Men Conference as handelsmerk laat registreer om die misbruik daarvan te voorkom.

Buchan het ook sy eie naam en dié van sy TV-program, Grassroots, om dieselfde rede laat registreer.

Buchan het gister gesê hy wil voorkom dat mense dié name misbruik deur dinge onder sy vaandel te verkondig waarmee hy nie saamstem nie, of geld insamel by niksvermoedende mense wat meen dit gaan vir ’n goeie doel.

Hy wil niemand keer om die evangelie te verkondig nie, maar as hulle nie met hom oorleg pleeg oor die gebruik van dié name nie, moet hulle dit onder hul eie vaandels doen.

Buchan het op sy laaste Mighty Men-konferensie op die plaas Shalom buite Greytown gesê hy gee die aflosstokkie oor na die volgende geslag.

Hulle moet voortgaan om die boodskap van die Mighty Men-konferensies verder uit te dra.

Vanjaar word daar in Suid-Afrika drie sulke konferensies met Buchan se medewete en goedkeuring gehou.

Aanstaande maand vind Mighty Men Bosveld op ’n plaas net buite Polokwane plaas. Buchan sal op een sessie optree.

In April is daar Mighty Men-konferensies in die Karoo en by die Vaaldam. Buchan sal self op die Karoo-konferensie optree, maar nie by die Vaaldam nie.

Hy tree ook in Mei op ’n Mighty Men-konferensie in Yorkshire, Engeland, op. Daar word ook ’n konferensie met sy goedkeuring in Australië gehou, maar hy sal nie self daar wees nie.

Buchan sê hulle het nog nie groot probleme met die misbruik van die name gehad nie, maar daar was al ’n geval dat sy foto gebruik is op ’n plakkaat vir ’n geleentheid waarvan hy niks geweet het nie.

Oor bewegings soos Mighty Kids sê Buchan het hy nie bande mee nie, maar dié naam pla hom nie omdat dit nie Mighty Men is nie.

Buchan het hom ook ten sterkste gedistansieer van ’n vals e-pos oor Mighty Men-konferensies wat die ronde doen.

Daarvolgens sou die ANC bepaal het die meeste mense op elke Mighty Men-konferensie moet voortaan swart wees.

Hy sê hy is verbind tot rasseharmonie in die land en dié soort e-pos help niks. Hy beskou dit nie eens as ’n grap nie, maar as veragtelik.

Buchan het self in die verlede herhaaldelik gesê hy wil swart mense graag met sy boodskap bereik, byvoorbeeld deur ’n massasaamtrek in Soweto te hou.

- Volksblad