Man oor beweerde passiemoord voor
2010-03-11 02:43
- Artikelopsies
- Deel
- Kry Volksblad op
Die man wat na bewering ’n ander man, vermoedelik uit jaloesie, in sy gewese vrou se meenthuis in Heuwelsig, Bloemfontein, doodgeskiet het, gaan waarskynlik binne twee weke aansoek doen om op borgtog vrygelaat te word.
Die verhoor van mnr. George Coetzer (52) van Bloemspruit is gister in die Bloemfonteinse landdroshof vir ’n formele borgaansoek tot 23 Maart uitgestel.
Hy word daarvan aangekla dat hy mnr. Limpie Vermaak (35) op 20 Februarie vermoor het deur hom in die kop te skiet.
Mnr. Paulo Giorgi, sy regsverteenwoordiger, het gister voor landdros K. Malali gesê hy gaan moontlik aansoek doen dat Coetzer vir sielkundige waarneming gestuur word.
Die staat het reeds vroeër gesê dat ’n aansoek om Coetzer op borgtog vry te laat, teengestaan sal word.
Mej. Mbokazi Mkiva het aangekla.
- Na verneem word, het Coetzer die Saterdagaand by sy gewese vrou, van wie hy glo verlede jaar geskei is, se meenthuis opgedaag. Vermaak en sy verloofde en hul dogtertjie was daar. Toe hy inkom, het hy Vermaak glo daar gesien. Die verloofde en die kind was in die badkamer. ’n Skoot is toe geskiet en Vermaak het ’n noodlottige kopwond opgedoen. Coetzer het glo weggery.
Hy is later die aand opgespoor en in hegtenis geneem.
Sy vuurwapen, waaruit die skoot vermoedelik gevuur is, is later in ’n koivisdam van ’n ander hoewe op Bloemspruit as die een waarop Coetzer ’n kamer gehuur het, deur polisieduikers uitgehaal.
- Volksblad