Malema soek wit huishulp
2012-01-06 22:30
THABA NCHU. – Die ANC-jeugliga (ANCJL) wil nie wittes die see in jaag nie, het dié organisasie se beleërde leier, mnr. Julius Malema, gister gesê.
“Oor tien jaar moet daar wit huisbediendes wees,” het Malema, wat weer na die vurige ou Malema gelyk het, gister in Thaba Nchu aan meer as 1000 mense in ’n stampvol saal gesê.
Malema het gepraat op ’n geleentheid wat deel vorm van die ANC-eeufees die naweek in Bloemfontein. “Huisbediendes word in die baas en madam se slaapkamer verkrag, maar kan niks sê nie omdat hulle hul werk sal verloor,” het hy vurig gesê.
Oor die feit dat slegs Zuma Sondag ’n toespraak sal hou en geen ander alliansie- en liga-leier nie, het Malema gesê Zuma praat namens die ANC. “Hier is ek in Mangaung en ek praat met julle. Zuma kan maar Sondag praat.”
Met verwysing na sy skorsing, het Malema gesê individue maak foute en “leiers” moenie dan dreig met dissiplinêre optrede nie.
“Jy dink jy kan mense vir vyf jaar skors, hulle op die kantlyn skuif en nog langer stil hou deur ’n appèlverhoor. Jy kan nooit ’n revolusionêr onderdruk nie!”
Hy het weer uitgevaar oor banke, myne en grond wat in wit besit is. “Die media moenie vir my sê ek besit grond nie. Ek besit net ’n stukkie grond.”
Hy het oudpres. Nelson Mandela geloof en gesê dit was weens sy visionêre leierskap dat die ANC sy beleid van vreedsame verset laat vaar het.
“Mandela het gesê dit help nie om briewe te skryf aan die koningin van Engeland nie. Hý het gesê ons moet die wapen opneem. Hy was toe leier van die ANCJL. Dieselfde moet vandag gebeur as ons ekonomiese vryheid wil hê.”
Ná Malema het die minister van sport, mnr. Fikile Mbalula, ook in ’n vurige toespraak, die ANC gekap. “Die ANCJL is ’n outonome en militante organisasie. Die moederliggaam moenie probeer om dit te verander nie. Hulle sal dit nie regkry nie.”
Mbalula het Malema deurgaans geprys. “Daar was baie ANCJL-leiers voor Malema en hulle het groot leiers geword. Hulle het almal deur die prosesse tot bo gekom. Hoekom kan Julius nie?”
Oor die meer as R100miljoen wat die ANC-eeufees kos, het Mbalula gesê geld is nie ter sprake nie. “Wat is R100miljoen? Geld is f*k*l!”
Ná die vergadering het die skare aanhoudend “Skiet die boer” gesing terwyl Malema en sy trawante “shoot to kill, kiss the boer” gesing het. Voordat Malema opgedaag het, het die skare gesing “Malema bid vir ons, ons ly. Die stort gee ons probleme.”)Skaars 20km van waar Malema en Mbalula toesprake gehou het, het pres. Jacob Zuma in Botshabelo ’n blitsbesoek gebring, waar hy inwoners belowe het dat hulle gou lopende water sal hê.
- Volksblad