LP’s ontevrede oor sekuriteitsmaatreëls

KAAPSTAD. – Die mate waartoe sekuriteitsmaatreëls vir die staatsrede verskerp is, het parlementslede en parlementêre personeel se werk gister ontwrig.

“Dit is duidelik dat die sekurokrate die oorhand kry in die regering,” het mnr. Mangosuthu Buthelezi, IVP-leier, gesê. Hy was uitgesproke oor die groeiende afstand tussen die regering en die bevolking.

“Die atmosfeer van gravitas en ordentlikheid van vorige jare is vervang deur ’n atmosfeer van erge sekuriteit, wat die landsburgers se lewe ontwrig.”

Sommige parlementêre personeel wat nie spesifiek vir die staatsrede geakkrediteer is nie, moes hul kantore verlaat en is vroeg huis toe gestuur deur sekuriteitspersoneel wie se gedrag wyd as oordadig en onbeskof beskryf is.

Die middestad van die Moederstad is reeds van 09:00 omgeskep in ’n stadig bewegende verkeersknoop deurdat verskeie hoofroetes die hele dag afgesper is.

Teen sononder was selfs Adderleystraat afgesper en onnatuurlik stil, met kwaai polisielede wat die publiek op ’n afstand gehou het.

Politici was nie beïndruk nie.

Na verneem word, het een LP doodgewoon geweier om te stop en deurgery, terwyl ’n ander sy motor net daar gestop, uitgeklim en begin het om parlement toe te stap voordat die polisie bes gegee het.

- Volksblad