Jansen open skool op Kroonstad
2012-02-02 22:32
KROONSTAD. – “St. Peter Claver-skool is dalk die enigste kans wat jy het tot sukses. Moenie dit opmors nie.”
Só het prof. Jonathan Jansen, rektor van die Vrystaatse Universiteit (UV), gister vir leerlinge op die amptelike opening van dié nuwe skool gesê.
Dit kom na aanleiding van sy gesprek met Oprah Winfrey tydens haar besoek aan die UV om haar ere-doktorsgraad te ontvang. “Ek het sowat 30 minute alleen met haar spandeer.
“Ek vra haar toe hoe ’n swart vrou uit Mississippi, waar hulle swart mense gehang het net omdat hulle opgedaag het, die mees invloedryke vrou in die wêreld geword het. Sy het vir my gesê wanneer sy ’n kans gekry het, soos ’n goeie opvoeding, het sy dit aangegryp.”
Hy het gesê sy ouers het hom geleer om ander mense met respek te behandel.
“Suid-Afrikaners doen dit nie. Selfs die Zoeloe-koning het pas slegte goed oor gay mense gesê. Wat ’n skande.”
Die hoërskool is geopen by die Notre Dame-klooster net buite Kroonstad. Die Laerskool St. Peter Claver het in 1907 ontstaan toe vyf nonne van die Notre Dame-susterskap in Engeland ’n skooltjie naby die Kroonstad-stasie begin het. Dit is nou in Constantia geleë.
Die oorspronklike kosskool wat in 1908 op die klooster-perseel begin is, is in 1972 deur die nonne gesluit in protes teen ongelykheid in die Suid-Afrikaanse onderwysstelsel en die gebou is verkoop. Die klooster het etlike kere van hande verwissel, totdat dit in die 1990’s heeltemal in onbruik verval en gevandaliseer is. Die afgelope tien jaar is die kapel en dele van die hoofgebou gerestoureer.
Gister, die dag waarop die skool amptelik geopen is, was die 208ste verjaardag van die stigting van die Notre Dame-susterskap in Frankryk.
- Volksblad