Ingryping verduidelik

KAAPSTAD. – Die Vrystaatse departemente van vervoer, paaie en polisie het ’n skuldrisiko van R4,2 miljard op die provinsiale fiskus geplaas.

Die regering is nou besig om dié bedrag te verifieer.

Dit was een van die redes waarom die regering, onder leiding van mnr. Pravin Gordhan, minister van finansies, einde verlede jaar in die provinsie ingegryp het.

Gordhan het die inligting gister op ’n sitting van die staande komitee oor finansies bekend gemaak.

Hy het saam met ses ander ministers voor die komitee verskyn om te verduidelik waarom die regering einde verlede jaar in die Vrystaat, Limpopo en Gauteng ingegryp het.

Gordhan sê die regering het reeds gevind dat tot 23 nuwe padprojekte in die Vrystaat toegeken is sonder dat die regte tenderprosedures gevolg is.

“Die koste van paaie in die provinsie was meer as dubbel die kontrakwaarde daarvan wat goedgekeur en afgeteken was. Teen 31 Oktober verlede jaar het die departement van vervoer en paaie in die Vrystaat reeds 66% van sy begroting bestee. Daar word verwag die departement sal aan die einde van die boekjaar (31 Maart) R448 miljoen oor die begroting wees.”

Gordhan het gesê die kabinet het op 5 Desember verlede jaar besluit om ingevolge artikel 100 (1) (a) van die Grondwet in die Vrystaat in te gryp.

“Dit was nodig geag om die provinsiale tesourie te versterk en kritieke poste in die provinsie te vul.”

Gordhan sê die Vrystaatse departement van polisie, paaie en vervoer het nie behoorlike verskaffingsprosesse bedryf nie.

Verder is die wet wat leningsmagte reguleer, oortree en was daar erge swak plekke met die departement se batebestuurstelsels.

Gordhan sê die Vrystaatse tesourie het nie behoorlike finansiële dissipline aan die dag gelê nie en moet aangespreek word.

“Daar was ook duidelike verontagsaming van grondwetlike en fiskale prosedures.”

Mnr. Dennis Bloem, Cope-LP van Kroonstad wat die komitee-vergadering bygewoon het, het die provinsiale owerhede gekritiseer.

“Dit lyk my ons het ’n klomp kroeks aangestel in die Vrystaat. Mense wat in die provinsies aangestel word, kom in die poste op die rug van hul ‘comrade’-skap en dan steel hulle die armes se geld.”

Gordhan sê tot op datum is die nodige artikel 100-regulasies wat uitgevoer moet word in die provinsies reeds uitgestuur.

“Die premier in die provinsie het reeds aangedui hy is gewillig en gereed om die prosesse in te stel. Die tesourie het reeds tegniese ondersteuningspersoneel gedelegeer na die provinsiale tesourie toe.

“Verdere assessering word steeds gedoen om te bepaal watter ander maat­reëls nodig is vir die provinsiale tesourie om weer op dreef te kom.”

- Volksblad