Liezel gou op SABC3
2010-09-09 01:02
- Artikelopsies
- Deel
- Kry Volksblad op
Kaapstad
Die Idols-aanbieder Liezel van der Westhuizen het ’n nuwe werk, maar sy gaan darem eers seker maak die nuwe sangkampioen word gekroon.
Van der Westhuizen en Katlego Maboe is die aanbieders van SABC3 se nuwe ontbytprogram wat van 4 Oktober op weeksdae van 05:30 tot 07:30 uitgesaai word.
Totdat die Idols-wenner op 2 November aangekondig word, sal sy weekliks van Johannesburg na Kaapstad reis, waar die nuwe program regstreeks uitgesaai word.
Katlego was voorheen die aanbieder van DEKAT en is deesdae ’n veldaanbieder van 50/50.
Tswelopele Productions, wat Top Billing en Pasella vervaardig, is die kreatiewe span agter die nuwe ontbytprogram.
“Ek is baie opgewonde dat ek die geleentheid gegun is om Idols te voltooi terwyl ek ook aan die ontbytprogram werk,” het sy gesê. “Die Idols-span is soos familie.”
Sy moet egter haar werk as platejoggie by Jacaranda FM bedank.
Die nuwe ontbytprogram het nog nie naam nie en hiervoor word kykers se hulp ingeroep. Volgens mnr. Bradley van der Berg van Tswelopele Productions begin ’n SMS-kompetisie vandag op SABC3, waarin kykers hul voorstelle vir ’n naam kan stuur.
“Ons is baie opgewonde oor die program,” het hy gesê. “Dit gaan anders wees as enige oggendprogram en gaan veral op leefstyl fokus.”
Die inhoud sal ’n 50-50-verdeling van Engels en Afrikaans wees en sal benewens nuus, sake, sport en die weer ook insetsels oor fiksheid, kos, die omgewing en mode insluit.
Die vleispaleis Ewan Strydom gaan die fiksheidsinsetsels aanbied en Brigitte Willers, voormalige model en Survivor-deelnemer, die weervoorspelling.
- Volksblad