‘Hou jou jou smoel, Von Maltitz’
2012-02-02 22:50
EDDIE VON MALTITZ moet shut up.
Dit is wat die Menseregte-aksiegroep (Hurag) van Welkom met ’n nuwe veldtog beoog en hulle is vasbeslote om dit te laat gebeur.
Dié groep het selfs operasie Shut Up Eddie Von Maltitz begin en oorweeg dit om Von Maltitz, ’n boer van Ficksburg, na die gelykheidshof te sleep. Von Maltitz lag hieroor. Stilkry, gaan hulle hom nie stilkry nie, sê hy.
Volgens dié organisasie wil hulle die gelykheidshof vra om teen Von Maltitz se “haatspraak en rassistiese en diskriminerende uitsprake” op te tree.
“Hy is net soos Eugene Terre’Blance (vermoorde AWB-leier). Hy hou daarvan om op swart mense te skreeu en sê vir die straatverkopers die vrugte en groente wat hulle verkoop, kom van wit boere. Hulle moet hul eie mense se produkte verkoop,” sê mnr. David Stoffel, uitvoerende voorsitter van Hurag. Volgens Stoffel moet Von Maltitz sy trots sluk, die publiek om verskoning vra en stilbly.
Volgens Stoffel het Hurag besluit om die veldtog te begin om Von Maltitz tot verantwoording te roep en weens die Vrystaatse regering se gebrek aan optrede.
Von Maltitz het gelag toe Volksblad hom nader om kommentaar. “Hulle gaan my nie stop nie. Hulle sal my nooit stilmaak nie. As George Bush (gewese Amerikaanse president) my nie kon stilmaak nie, sal hulle ook nie. Ek baklei vir dieselfde doel as hulle. Die klein snotneuse is kwaad vir my plakkate.”
Hy ry met ’n bakkie waarop plakkate hang van stories uit koerante oor hongersnood in Afrika met groot foto’s van uitgeteerde mense. Von Maltitz sê hy baklei onder meer teen korrupsie, slegte paaie en vuil drinkwater.
- Volksblad