Glanspaartjie se verhouding ‘op ys’

JOHANNESBURG. – Die verhouding van Suid-Afrika se gunsteling-glanspaartjie, die sangers Theuns Jordaan en Elizma Theron, is “voorlopig op ys geplaas”.

Die twee het sowat ’n jaar ná baie bespiegelinge in die media erken dat hulle saam is.

Gister het ’n goeie kennis van die twee wat op voorwaarde van anonimiteit gepraat het, bevestig dat hulle die verhouding “vir eers” verbreek het.

“Ek dink die vernaamste rede is dat hul onderskeie loopbane baie hoë eise aan hulle gestel het. Sover ek weet, is hulle nog baie goeie vriende en niemand sal weet of hulle dalk in die toekoms weer bymekaar gaan uitkom nie. Kom ons sê maar die verhouding is voorlopig op ys geplaas.”

Mnr. Anthony James van Select-musiek – Theron se platemaatskappy – sê hy kan nog nie bevestig of die verhouding inderdaad verbreek is nie.

“Ek kon nog nie self met Elizma daaroor praat nie.”

Pogings om self met Theron en Jordaan te praat, het misluk. In die jongste uitgawe van Huisgenoot word egter geskryf dat Jordaan, volgens ongenoemde vriende van die paartjie, “te dominerend” was.

“Hy wil ’n sê hê oor alles en sy luister net vir hom,” het iemand in die binnekring al vroeër vanjaar gewaarsku, skryf Huisgenoot.

- Volksblad