Gidshonde is dit werd
2012-01-27 22:22
JOHANNESBURG. – Dit kos tyd, geduld en baie geld, maar om van ’n vriendelike brakkie ’n gidshond te maak, maak ’n groot verskil in baie lewens.
Die Suid-Afrikaanse Gidshondvereniging (Saga) is die enigste organisasie in Afrika wat gidshonde oplei. Volgens mnr. Pieter van Niekerk, Saga-woordvoerder, het hulle ’n waglys van omtrent ’n jaar.
“Ons lei so 60 honde per jaar op, maar jy moet onthou nie alle blinde mense wil gidshonde hê nie.”
Volgens mnr. Joel van Stavel, ’n gidshondafrigter in Johannesburg, is dit “soos om ’n onderwyser te wees”.
“’n Mens moet baie geduld hê. Sommige honde leer vinniger as ander en party het ’n bietjie ekstra aandag nodig. Sommige is meer sensitief. Jy moet die hond se behoeftes kan lees.”
Voornemende gidshonde word op die ouderdom van ses weke geplaas by mense wat hulle sowat ’n jaar lank grootmaak. Dan word hulle ongeveer ses maande lank opgelei voordat hulle by ’n gesiggestremde persoon geplaas word.
Elke afrigter het ses honde wat hy op ’n slag oplei en hy moet daagliks met hulle werk. Hulle neem die honde na verskillende plekke om hulle aan verskeie omgewings en omstandighede gewoond te maak. Dit kos sowat R70000 om een hond op te lei, insluitend uitgawes soos veeartsbesoeke. Alle kos word deur Purina Petcare geborg.
Mense kan ’n hond vir R10000 borg. Die res van die koste word gedek deur Saga self, met geld wat hoofsaaklik deur insamelingsprojekte verkry word, hoewel hulle vantevore ook skenkings van die Nasionale Loteryraad ontvang het.
“Ons kry glad nie meer geld van die Lotto nie en ons het nog nooit geld van die regering gekry nie, nie sedert ons ontstaan in 1953 nie,” sê Van Niekerk.
Saga teel hul eie honde omdat hulle spesifiek vir temperament en sekere eienskappe teel, het Van Niekerk gesê. Hulle werk egter nou saam met geregistreerde telers. Volgens Van Stavel is dit gewoonlik labradors en apporteerhonde (golden retrievers) wat as gidshonde opgelei word. Soms kan Duitse herdershonde ook opgelei word, maar dit gebeur min in Suid-Afrika omdat dié honde hier nie die regte temperament het nie.
“’n Gidshond moet innemend van aard wees en die voortou kan neem. Hulle moet besluite namens die blinde persoon kan neem.”
- Volksblad