Troeteldier met familie, hondemaats verenig
2010-07-30 01:03
- Artikelopsies
- Deel
- Kry Volksblad op
Groblersdal
“Ons is nou weer ’n familie.”
Só het die Fernandes-gesin gister gesê terwyl hulle hul Bengaalse tier Panjo sagkens streel en liefkoos.
Die 18 maande oue tier – eindelik weer tuis op die wildplaas Jugomaro hier – het gister geduldig vir talle mediafoto’s geposeer terwyl hy sy bottel melk drink.
Panjo is Woensdagaand op die R25 sowat 40?km van Bronkhorstspruit en 10?km van die Verena-plakkerskamp gevind nadat hy Maandagaand uit sy eienaar, mnr. Goosey Fernandes, se bakkie ontsnap het.
Fernandes se seun, Justin (23), het gesê Panjo was so uitgehonger ná die twee dae dat hy met sy tuiskoms sowat 25?kg en gister nóg 15?kg vleis opgevreet het.
Hy het met Panjo gespeel terwyl die jong tier, duidelik uitgeput, op die grasperk voor die plaashuis gelê het.
“Panjo het gisteraand eers sy melk gedrink voordat hy op die bank in die TV-kamer aan die slaap geraak het.”
Panjo is ook met sy agt Jack Russell-vriende verenig.
Van vandag af slaap hy weer in sy “stukkie hemel op aarde”. Dit is ’n kamp van 100?m by 50?m, omhein met elektriese bedrading. Dit het ook ’n swembad, slaapgrot en speelgoed.
“Volgens natuurbewaringstandaarde behoort sy kamp 20m by 5m te wees. Maar ons het dit veel groter gemaak, want ons gaan binnekort vir hom ’n maat kry en met hulle teel.”
Fernandes het gesê hy het wel geldige permitte vir sy groot kat.
Die Marble Hall-polisiekantoor (Limpopo) het hom egter ingevolge die Wet op Vervoerpermitte vir wilde diere met R1?500 beboet omdat hy Panjo oor die provinsie se grens tussen Limpopo en Mpumalanga vervoer het.
“Ek sal die vervoerpermit baie vinnig uitsorteer.”
Limpopo se departement van omgewingsake en die Dierebeskermingsvereniging ondersoek ook Fernandes se optrede.
Fernandes het gesê: “Ek is ongelooflik lief vir my kietiekat”. Hy het Panjo “?’n lang ruk gesoen en gedruk” toe hulle tuis kom.
“Ons kry binnekort drie tiere en ’n drie weke oue wit tierwyfie, wat Panjo se teelmaat gaan wees.” Panjo is op drie weke by ’n teelplaas in Zeerust aangekoop nadat sy ma hom verwerp het omdat hy “sieklik” was.
“Panjo is ons kind. Noudat hy tuis is, is ons weer ’n familie.”
Fernandes se vrou, Rose, het gesê hulle is oorweldig deur al die oproepe van steun van dwarsoor Suid-Afrika, en Engeland.
“Ons is so dankbaar teenoor almal wat kom help soek het en is in ekstase dat hy gevind is.”
Die Springs-veearts waarheen Fernandes Panjo wou neem toe hy vermis geraak het, sal Panjo in Groblersdal kom besoek, het Fernandes gesê..
- Die Burger