Geen pornografie vir DStv, sê MultiChoice

JOHANNESBURG. – Die ritssluiter is toegetrek. MultiChoice het besluit téén pornografie en die moontlikheid van nuwe sekskanale op DStv se satelliet-betaaltelevisiediens.

Verskeie kerk- en gesinsgroepe het einde Februarie skerp gereageer op dié maatskappy se aankondiging dat hy dit oorweeg om pornografiese kanale te hê.

MultiChoice het gister bekend gemaak dat hy navorsingsdata hersien het van ’n intekenaarspeiling om te bepaal hoe kykers sal voel oor volwasse beeldmateriaal op betaaltelevisiekanale. Luidens ’n verklaring het die navorsing getoon “’n beduidende persentasie intekenaars is teen volwasse kanale, terwyl sommige nie omgee nie en ’n ander beduidende persentasie positief is”.

Mnr. Nolo Letele, uitvoerende hoof van MultiChoice, het gesê dit is jammer dat mense die navorsing geïnterpreteer het as dat ’n besluit rééds geneem is.

“MultiChoice doen gereeld navorsing om kykers se smaak te toets, asook hul indrukke van bestaande en nuwe televisiekanale. Só kan ons kliëntediens verbeter.”

Volgens hom sluit dié navorsing dikwels vrae in wat handel oor inhoud wat kliënte aangevra het, of kanale wat oorsee goed vaar. “Die peiling van drie weke gelede het gefokus op volwasse inhoud, aangesien daar binnekort kompetisie in ons bedryf is wat eersdaags in Suid-Afrika bekend gestel word. Dit is onbekend of hulle volwasse-inhoud-kanale as deel van hul dienste gaan bied.”

Mnr. Jackie Rakitla, hoofbestuurder van korporatiewe sake by MultiChoice, het vroeër gesê MultiChoice is die laaste paar maande “oorval” met versoeke vir volwasse inhoud. e.tv, wat ’n ruk gelede die uitsending van laatnag-erotika op Vrydae en Saterdae gestaak het, het vroeër gesê dit is gedoen omdat “e.tv se programinhoud gedurig hersien word”.

- Volksblad