Cele: 'Noem my generaal'

Johannesburg – Bheki Cele, die nasionale polisiehoof, het daarop aangedring dat hy van nou af as “generaal” aangespreek moet word nadat die militarisering van polisie­range goedgekeur is, het Beeld Woensdag berig.

“Ek word nou ‘generaal’ genoem,” het hy Dinsdag aan die parlement se portefeulje-komitee vir die polisie gesê.

Tog het lede van die komitee aangehou om hom “kommissaris” te noem, het Beeld berig.

Zweli Mnisi, die minister van polisie Nathi Mthethwa se woordvoerder, het aan Sapa gesê dat militêre range vir die polisie deur die kabinet goedgekeur is.

“Ons wil tans net sommige van die besonderhede rondom dit finaliseer, maar ons sal binnekort ‘n aankondiging maak,” het Mnisi gesê.

Beeld het in Februarie berig dat Mthethwa gesê het dat die nodige veranderinge en bevorderinge op operasionele vlak nog moes geskied.

Mthethwa het in Februarie gesê dat die implementering van die nuwe range binne “’n paar weke” aangekondig sal word.

Hy het ook daarop aangedring dat Cele reeds as “generaal” aangespreek moet word.  

Sapa