Boer by sy gesin vermoor
2012-01-23 21:34
POLOKWANE. – ’n Boer en bekende in landboukringe is gisteroggend koelbloedig op sy wildplaas buite Roossenekal in Limpopo doodgeskiet.
Mnr. Francois du Toit (38) se vrou, Eunice, en hul twee jong kinders, is daarna deur die aanvallers met kabelbinders vasgebind.
Du Toit was ’n voedingkundige by AlzuVoere in Middelburg, Mpumalanga.
Hy en sy gesin het op die wildplaas sowat 30 km buite Roossenekal gewoon. Sy ouers woon in ’n ander huis op die plaas. Hy het ook saam met sy pa geboer.
Lt.kol. Ronel Otto, polisiewoordvoerder, het gesê Du Toit het gister ná 01:00 iets buite die huis gehoor.
Hy het opgestaan om ’n pistool uit ’n kluis te kry. Drie aanvallers het intussen die huis ingekom. Dit is nog onduidelik presies waar en hoe hulle ingekom het.
Du Toit is in sy maag geskiet.
Volgens Otto het hy glo teruggeskiet op die drie mans. Nie een van hulle is gewond nie.
Du Toit is daarna nog ’n keer agter sy een oor geskiet.
Die aanvallers het toe mev. Van Niekerk, die egpaar se seun, Francois (12), en dogter, Stephanie (9), na ’n lapa buite die huis gevat.
Hul hande en voete is met kabelbinders vasgebind. Die aanvallers het twee gewere, twee pistole, geld en selfone uit die huis gesteel.
Hulle het toe in Du Toit se twee Nissan Navaras gevlug. Die swaar gewonde mnr. Du Toit het toe nog geleef.
Nadat hulle weg is, het mev. Van Niekerk, terwyl sy vasgebind was, op die grond aangeskuifel tot waar sy iets kon kry om haar los te sny. Sy het die bure op die tweerigtingradio ontbied.
Mnr. James Language was van die boere wat eerste opgedaag het.
Die bure het probeer om mnr. Du Toit in ’n voertuig te kry, “maar hy is in hul arms dood”, het ’n vriend gesê.
Language wou gister nie uitbrei oor wat gebeur het nie.
’n Vriend van Du Toit, wat nie genoem wil word nie, het gesê hy was baie betrokke by sy medemens. “Hy was ’n goeie, goeie mens. ’n Leier-boer,” het die man gesê. Du Toit was veral bekend onder lede van die Melkprodusente-organisasie (MPO).
“Dit is verskriklik en baie hartseer wat gebeur het,” het ’n boer wat daar naby boer, gesê.
Volgens Otto het die aanvallers een van die Navaras op die plaas gelos. Die ander voertuig is ’n ent van die plaas gekry. Dit is nie seker of hulle toe te voet gevlug en of makkers hulle moontlik opgelaai het nie.
Die polisie en boere het gister die gebied gefynkam.
Die Du Toit-familie was gister te geskok om oor die voorval te praat. Niemand was teen druktyd nog aangekeer nie.
- Volksblad