Bfn-gesin se huis in brand verwoes
2010-09-03 03:00
’n Gesin van Bloemfontein het gister verslae gestaan en kyk hoe die brandweer die laaste vlamme blus wat hul huis gedeeltelik in puin gelê het.
’n Hartseer mev. Michelle Jansen het gister aan Volksblad gesê hul gesin het alles verloor.
“My kinders het nie eens ’n bed om op te slaap nie. Ons het net die klere aan ons lyf oor.”
Die Jansens het nie versekering nie en net Jansen se man, Jacques, het werk.
“Ek het gery om die kinders by die skool te gaan haal. Op pad skool toe het ek die brandweer sien jaag, maar glad nie vermoed dis mý huis wat brand nie.”
Die Jansens woon die afgelope twee maande in die huis in Suikerbekkiestraat in Fauna.
Mev. Marietjie Bezuidenhout, wat in ’n woonstel aan die huis bly, sê sy het omstreeks 12:30 wasgoed gewas toe sy rook ruik.
“Ek het dadelik om gestap en gesien een van die ander bure is besig om die brand te probeer blus met tuinslange.”
Bezuidenhout het die brandweer gebel.
Toe Jansen saam met haar skoonma en twee kinders niksvermoedend by die huis opdaag, het die brandweer die meeste vlamme reeds geblus.
Volgens kapt. Chaka Marope, polisiewoordvoerder, het die brand buite die huis ontstaan en die gordyne het deur die hoofslaapkamervenster vlam gevat.
“Die huis binne het, buiten een klein vertrek, heeltemal afgebrand,” het Marope gesê.
Jansen sê sy het geen idee hoe die brand kon ontstaan nie.
“Nie ek of my man rook nie en ons maak ook nie vuur agter in ons erf nie. Iemand moes iets naby die huis aan die brand gesteek het. Alles is weg,” het Jansen huilend gesê.
Marope sê die polisie ondersoek ’n klag van brandstigting.
- Volksblad