Bekendes lei jou na bestemming

Suid-Afrikaanse motoriste kan nou die land se bekendste glanspersoonlikhede in hul motors laai én die skuld op hulle pak wanneer hulle verdwaal.

’n Bloemfonteinse onderneming genaamd GPS Creative het talle bekendes, onder wie die sanger Kurt Darren, die model Minkie van der Westhuizen, Nataniël, Oom Kallie Marie (Casper de Vries) en Dowwe Dolla (Margit Meyer-Rödenbeck) opgeneem sodat motoriste dit op hul voertuignavikasiestelsels (GPS’e) kan laai.

In plaas van die gerekenariseerde robotagtige stem wat gewoonlik navigeer, “praat” jou gunstelingbekende se stem oor jou GPS.

“Hi, ek is Kurt Darren, kom ons span die seile, waar wil jy wees?” sê dié sanger wat die treffer Kaptein sing. Wanneer die motoris sy of haar bestemming bereik het, sê Darren: “Laat sak die seile, jy is nou hier.”

Mnr. Kenneth Blair, ’n woordvoerder van GPS Creative, sê die opnames meng standaardaanwysings wat nodig is om ’n bestemming te bereik, met grappies en in hul unieke stemtoon en vertelwyse.

“My naam is Nataniël en ek gaan nou saam jou ry... ’n Mens los nooit ’n kind in ’n kar nie. ’n Kar het ’n spieëltjie. Ek dra nou nog lipstick... Daar’s verkeer voor... Ô... ô-ô... Ek het gewoonlik meer pret in ’n kar wat stilstaan... Hou aan met die pad,” is enkele van Nataniël se GPS-aanwysings.

Oom Kallie Marie (De Vries), se stem sê: “O, gatta patatta. Ek het satellietopvangs verloor... Pas op vir die boetebessietjies...”

Van der Westhuizen sê in Engels: “Wees nou geduldig... Daar is tipiese Johannesburg-verkeer voor...”

Darren het gistermiddag aan Volksblad gesê dit was aanvanklik vir hom vreemd om sy eie stem te hoor sê: “Ry een kilometer aan,” maar nou klink dit vir hom “cool”.

“Dit is ’n baie goeie idee. Ek het net my eie karakter daarin probeer sit. Ek het ingestem om dit te doen omdat dit ’n snaaksigheid is. Ek dink dit sal vir mense lekker wees om so iets te hê,” sê hy.

Dié opnames werk nog net met sekere van Garmin se GPS-stelsels. Mense kan op die webwerf www.gps-creative.com ’n lysie sien.

- Volksblad