Bekende VS-boer wen Zim-saak
2010-02-06 05:11
- Artikelopsies
- Deel
- Kry Volksblad op
JOHANNESBURG. – Mnr. Crawford von Abo, bekende Vrystaatse boer, het gister in die hooggeregshof in Pretoria een van die belangrikste regsdeurbrake gemaak vir alle Suid-Afrikaners wat in bepaalde omstandighede skade in die buiteland ly.
In Von Abo se geval was hy een van die slagoffers van pres. Robert Mugabe van Zimbabwe se grondhervormingsbeleid wat allerweë as drakonies beskryf word.
Von Abo het verskeie spogplase in Zimbabwe besit, maar almal is deur die Mugabe-regering sonder vergoeding van hom weggevat.
Gister het regter Bill Prinsloo beveel dat die regering en die minister van buitelandse sake gesamentlik verantwoordelik is vir die geldelike verliese wat Von Abo gely het weens die gebeure in Zimbabwe.
Sy prokureur, mnr. Ernst Penzhorn van Pretoria, het gisteraand gesê die uitspraak is sover sy kennis strek ’n grondverskuiwende uitspraak in Suid-Afrika omdat geen so ’n saak met sulke feite nog in ’n plaaslike hof gedien het nie.
Hy het gesê die volgende stap is nou dat Von Abo en sy regspan al Von Abo se skade uitwerk en dan die eis aan die regering en buitelandse sake oorhandig.
As hulle nie daarmee saamstem nie, sal Von Abo weer die hof moet nader.
“Dit sal waarskynlik nog ’n paar maande duur voordat alles afgehandel is,” het Penzhorn gesê.
Von Abo se sege gister het ’n lang geskiedenis waarin hy in die hooggeregshof in Pretoria ’n bevel in sy guns gekry het dat die regering verantwoordelik was om hom by te staan in sy pogings om die beslagleggings op sy plase in Zimbabwe te keer.
Die geding het selfs in die grondwethof gedraai.
Penzhorn het gesê gister se bevel was ’n “beginselbesluit” deur die hof.
Die uitspraak is in boerderykringe fyn dopgehou omdat verskeie ander Suid-Afrikaanse eienaars van plase in Zimbabwe ook van hul grond ontneem is.
Die moontlikheid is nie uitgesluit nie dat die Von Abo-beslissing die sluise nou kan ooptrek vir verskeie soortgelyke eise teen die regering.
Von Abo se regspan het in vroeëre hofstukke aangedui sy skade kan tot R500 miljoen beloop.
- Volksblad