Bejaarde vrygespreek ná skietdood

Die vryspraak van ’n bejaarde man van Koppies op aanklag van moord op sy vrou gister in die rondgaande hooggeregshof hier, het nie net tot ’n emosionele uitbarsting weens uiterste skok, hartseer, bitterheid en ongeloof in die hofsaal gelei nie, maar ook klaarblyklik ’n verdere wig tussen twee broers ingedryf.

Regter G.F. Wright het mnr. Adriaan Bekker (67) van die plaas Spaarveld buite Koppies vrygespreek en ontslaan op aanklag van moord.

Bekker het sy “humeurige” vrou, Felicia Janita (63), op 9 September 2008 in hul huis raakgeskiet nadat mev. Bekker glo met ’n broodmes in sy slaapkamer op hom afgestorm het. ’n Voortslepende geïrriteerdheid met haar “omstandighede” is aangevoer as rede vir dié daad.

Hy het drie “waarskuwingskote” afgevuur, waarvan een die dak getref het. Mev. Bekker is raakgeskiet en is uit die kamer. Sy het in die gang ineengesak. Sy is dae later in ’n hospitaal dood.

Volgens die verdediging het mnr. Bekker sy vrou onteenseglik “uit noodweer” raakgeskiet omdat sy “lewe in gevaar” was. Mnr. Bekker het getuig hy het “waarskuwingskote” afgevuur om sy vrou “skrik te maak”, te “verwilder”. Hy sê hy wou haar nie raak- of doodgeskiet het nie.

Die staat daarteenoor, het die geloofwaardigheid van sy getuienis uitmekaargeskeur.

Regter Wright het skaars die hofsaal verlaat toe mev. Adri Bekker, skoondogter van mnr. Bekker, opgestaan en in ’n emosionele uitbarsting ten aanhore van almal in die hofsaal haar ongeloof en skok uitgespreek het.

“Die boodskap word uitgestuur dat my skoonma ‘mesmal’ was. Sy was nie. Hierdie (verhoor) was ’n mors van almal se tyd en geld,” het mev. Bekker ontsteld gesê.

Haar man, Juan (42), het buite die hof aan Volksblad gesê geregtigheid het nie geskied nie.

Volgens die getuienis van mnr. Juan Bekker, die jongste seun, het die verhouding tussen hom en sy pa ná die skietvoorval “versleg”.

Bekker jr. het ook “nie ’n verhouding” met sy broer, Hugo (43), nie omdat dié nie in die hospitaal was toe hul ma se masjiene afgeskakel is nie.

Mnr. Hugo Bekker wou sy ma nie in dié toestand onthou het nie.

Mnr. Bekker sr. het vanuit sy rolstoel ingegryp toe Hugo in die emosionele uitbarsting na sy skoonsuster gekap het.

Mnr. Bekker sr. het regdeur regter Wright se uitspraak baie moeg gelyk en onrustig in sy rolstoel gesit. Sy oë was toe en sy gesig vertrek van pyn.

Hy het kliphard begin huil toe regter Wright in sy uitspraak uitgelig het hoe lief mnr. Bekker sr. sy oorlede vrou gehad het.
Adv. Jacques Harrington het aangekla.

Adv. Gerhard van Rhyn in opdrag van Otto Krause Ingelyf van Roodepoort het mnr. Bekker sr. verdedig.